ტელეკომპანია "პიკ"-მა მაუწყებლობა შეაჩერა

ტელეკომპანია "პიკ"-მა მაუწყებლობა შეაჩერა. როგორც "ინტერპრენიუსს" "პიკის" საინფორმაციო სამსახურის ხელმძღვანელმა ეკატერინე კოტრიკაძემ განუცხადა, "საზოგადოებრივმა მაუწყებელმა" "პიკთან" ხელშეკრულება გააუქმა , რის გამოც "პიკის" მაუწყებლობა გაჩერდა.

"დონორმა "საზოგადოებრივმა მაუწყებელმა" კონტრაქტი გააუქმა ჩვენთან. ამის გამო ჩვენი მაუწყებლობა ოფიციალურად გაჩერებულია და ეთერში აღარ გავდივართ. ჩვენ წავიკითხეთ მაუწყებლის განცხადება, რომელშიც აღნიშნული რამდენიმე მიზეზი, რა პრეტენზიაც ჩვენთან აქვთ. ჩვენ კი ოფიციალურ, დამოუკიდებელ აუდიტს ვითხოვთ, რათა გაირკვეს პირობის რა მუხლები დავარღვიეთ და რას გვაბრალებენ. თუ რამე პრობლემები იყო რატომ ადრე არ გაგვაგებინეს?", - განაცხადა ეკატერინე კოტრიკაძემ.

მისივე ინფორმაციით, "საზოგადოებრივმა მაუწყებელმა" კონტრაქტი იმის გამოც გააჩერა, რომ "პიკმა" რამდენიმე დღის წინ პროტესტის ნიშნად საინფორმაციო გადაცემაში მდუმარე სიუჟეტები გაუშვა.

"პროტესტის ნიშნად საინფორმაციო გადაცემაში ჟურნალისტები დუმდნენ. ეს იყო ჩვენი პროტესტი იმის შესახებ, თუ რატომ შეგვექმნა პრობლემები. თუმცა კონტრაქტის გაუქმება საზოგადოებრივმა მაუწყებელმა უფრო ადრე გადაწყვიტა, ვიდრე ეს საპროტესტო მდუმარე საინფორმაციო გადაცემა გავიდოდა ეთერში. ჩვენ ვართ ჟურნალისტები, არ ვართ ფაბრიკა და გვაქვს სიტყვის თავისუფლების უფლება", - აღნიშნა ეკატერინე კოტრიკაძემ.

"პიკის" თანამშრომლების განცხადებით, 400 პროფესიონალი ადამიანი სამსახურის გარეშე რჩება. ასევე ირღვევა იმ ეთნიკური უმცირესობების უფლებები, რომლებიც საქართველოში ცხოვრობენ და ინფორმაციებს ქვეყანაში განვითარებული მოვლენების შესახებ სწორედ "პიკისგან" იღებენ, რომელიც ერთადერთი რუსულენოვანი ტელეკომპანიაა საქართველოში.

"როგორც კი გაითიშა ჩვენი სიგნალი, ხალხი უკვე რეკავს. ზარები არა მარტო საქართველოს ხვადასხვა რეგიონებიდან, ასევე, მსოფლიოს სხვადასხვა ქვეყნებიდანაც შემოდის. მათ აინტერესებთ, რატომ აღარ ვმაუწყებლობთ", - აცხადებენ "პიკის" თანამშრომლები.

როგორც ისინი აღნიშნავენ, აპროტესტებენ "საზოგადოებრივი მაუწყებლის" გადაწყვეტილებას და ეთერში დაბრუნებას ითხოვენ.

იხილეთ ვიდეო

"ინტერპრესნიუსი"