"საბაში" ხანძრის გამომწვევი მიზეზების დასადგენად ექსპერტები მუშაობენ

სავაჭრო ცენტრ "საბაში" ხანძრის გამომწვევი მიზეზების დასადგენად ექსპერტები მუშაობენ. როგორც "ინტერპრესნიუსის" კორესპონდენტი "საბას" მიმდებარე ტერიტორიიდან იუწყება, ადგილზე მუშაობენ მეხანძრეებიც, რომლებიც ცეცხლის შემორჩენილ კერებს აქრობენ.

ამასთან, "საბასთან" იმყოფებიან დაზარალებულები და ასევე იმ ფართების მფლობელები, რომლებზეც ხანძარი არ გავრცელდა.

ამასთან, "საბას" მფლობელ პაატა კაჭარავას განცხადებით, გუშინდელი ხანძრის შემდეგ ზარალი, სავარაუდოდ, რამდენიმე მილიონ ლარს შეადგენს. რაც შეეხება ხანძრის გამომწვევ მიზეზებს, კაჭარავა ვარაუდობს, რომ ეს მოკლე ჩართვას არ გამოუწვევია, როგორც გუშინ ითქვა.

მისი თქმით, სავაჭრო ცენტრი იმ მოვაჭრეებს, რომლებმაც სავაჭრო ფართები დაკარგეს, ალტერნატიულ თავისუფალ ფართებს სთავაზობს. მისი ინფორმაციით, გუშინდელი ხანძრის შედეგად დამწვარია 6 000 კვადრატულ მეტრზე მეტი ფართობი.

დიდუბეში, სავაჭრო ცენტრ "საბაში" ხანძარი გუშინ გაჩნდა. ადგილზე საგანგებო სიტუაციების სამსახურის 20-მდე ავტოცისტერნა, 3 სპეცმანქანა და სამაშველო ჯგუფები გვიანობამდე მუშაობდნენ.

ხანძრის შედეგად შენობის მეორე სართული მთლიანად დაიწვა და ნაწილობრივ ჩამოიშლა. იმ ნაწილიდან კი, რომელზეც ცეცხლი არ გავრცელებულა, მოვაჭრეებმა ავეჯის გამოტანა მოასწრეს.

"ინტერპრესნიუსი"