ჭუბერში მომხდარი ავარიის შედეგად ენგურში დაკარგულთა ახლობლები დახმარებას ითხოვენ
სვანეთში, სოფელ ჭუბერში მომხდარი ავარიის შედეგად მდინარე ენგურში დაკარგულთა ახლობლები დახმარებას ითხოვენ. დაღუპულთა ნათესავები ძებნის პროცესში სამაშველო სამსახურის ჩართვასა და იმ ტექნიკას ითხოვენ, რომლის საშუალებითაც გარდაცვლილთა ძებნა შესაძლებელი გახდება.
როგორც "ინტერპრესნიუსს" მდინარეში დაკარგულთა ახლობელმა სოფიკო ლომიამ განუცხადა, ავარიის შედეგად ოთხ გარდაცვლილს მდინარე ენგურში უკვე მესამე დღეა უშედეგოდ ეძებენ. მისი თქმით, ძებნის პროცესი მხოლოდ ერთი ხის ნავით ხორციელდება.
"ადგილობრივები ამბობენ, რომ შიშველი ხელებით ვერაფერს ვაკეთებთ, მხოლოდ ერთი ხის ნავი გვყავსო. ისინი მაშველებსა და დიდ კატერს ითხოვენ, რომელიც მათ ძებნაში დაეხმარება. ადგილზე კი ამის საშუალება არ არის. გუბერნატორის მოადგილესაც ვესაუბრე, რომელიც მეუბნება, რომ მე არაფერი შემიძლია, პატარა კაცი ვარო. დახმარებას ამ დრომდე უშედეგოდ ვითხოვთ", - აღნიშნა ლომიამ.
მისი ინფორმაციით, დაკარგულია ოთხი პირი, მათ შორის 24 წლის ტყუპი დები, მათი დედა და ბიძა. მათ რუსეთიდან ბაბუა გადმოასვენეს.
ბამბის რიგში რესტორანი იწვის - ადგილზე 4 სახანძრო მუშაობს
დამწვარია 200-დან 250 კვ.მ ფართობი - რა ვითარებაა ბაზრობა "თერგის" ტერიტორიაზე
