ნანიკო ხაზარაძე: ჯანეტ ქერდიყოშვილს აგრესიულად შევუტიე

"ორშაბათს, 23 სექტემბერს ეთერში გავედით, მაგრამ ისეთი შეგრძნება მაქვს, რომ უკვე ძალიან დიდი ხანია, ერთად ვმუშაობთ", - ამბობს ნანიკო ხაზარაძე, "იმედის" "დღის შოუს" ერთ-ერთი წამყვანი, რომელსაც წელს ორ ახალ პარტნიორთან (სოფო ნარჩემაშვილი და ჯანეტ ქერდიყოშვილი) ერთად უწევს პირდაპირ ეთერში მუშაობა.

- ნანიკო, როგორ გრძნობ თავს ახალ პარტნიორებთან ერთად, როცა გვერდით აღარ გყავს დოდოშკა ხურცილავა და ია ფარულავა?

- სამაგიეროდ, მყავს არაჩვეულებრივი სოფიკო და ჯანეტი. მათთან ერთად, საკმაოდ კომფორტულია მუშაობა... პირდაპირ ეთერში ისე გავედით, "პრაგონიც" არ გვქონია. თქვენ წარმოიდგინეთ, უკვე შესანიშნავი რეიტინგიც გვაქვს, რაც ძალიან მიხარია.

- შოუს ახალი წევრების შერჩევისას, როგორც ამ საქმეში გამოცდილმა ადამიანმა, მონაწილეობა თუ მიიღე?

- კი, როგორ არა, ჯანეტს კასტინგებზე ვესწრებოდი და მინდა, გითხრათ, რომ მან სრულიად გამაოცა, საკმაოდ კარგი შედეგები აჩვენა. ყველა დავალება საუკეთესოდ შეასრულა, მკაცრ კასტინგებს გაუძლო. ის კი არა, ერთ-ერთ დღეს ისე აგრესიულად შევუტიე, - დავალება იყო ასეთი, გვაინტერესებდა თავს როგორ დაიცავდა და გაგვაკვირვა, - ოსტატურად დაიცვა თავი. მაგარი გოგოა... მომწონს, მისი მონაწილეობა ჩვენს შოუში. როგორც ჩანს, "დღის შოუ" ხალხსაც მოეწონა, რადგანაც, როგორც გითხარით, 3 დღის ფონზე საკმაოდ მაღალი რეიტინგი გვაქვს.

- რას გვეტყვი შენს მეორე პარტნიორზე - სოფო ნარჩემაშვილზე?

- სოფიკო გამოცდილი ჟურნალისტია და ამასთან, დადებითი, დადებითი, დადებითი და კიდევ დადებითი ადამიანი. ამ სიტყვას დაუსრულებლად გავიმეორებ. ხომ გეუბნებით, ისეთი შეგრძნება მაქვს, რომ ერთად ძალიან დიდი ხანია, ვმუშაობთ.

- გადაცემაში, როგორც ადრე, ექსპრომტები თუ გექნებათ. ამაში რამდენად აგყვებიან თანაწამყვანები?

- კი, გვექნება. მე საკუთარ თავს ოლეგ პოპოვს ვუწოდებ, რადგანაც პირდაპირ ეთერში ყოველთვის საოცარი ექსპრომტების კეთება მიწევს... მაგალითად, გუშინ, გადაცემაში მე და ჯანეტმა იმდენი ვივარჯიშეთ, რომ ბოლომდე დავიხარჯეთ, ეს შოუს ნაწილია ...

ლალი ფაცია