ტუალეტის ფოტოგრაფია - ნიკა გრიგოლიას ახალი საქმიანობა?

რაც ნიკა გრიგოლიამ "კომედი შოუს" შემადგენლობა დატოვა, ტელეეკრანზეც იშვიათად ჩანს. სულ ბოლოს "ცეკვავენ ვარსკვალების" ერთ-ერთ შოუში მიიღო მონაწილეობა, როდესაც კოტიკო თოლორაიასა და მის მეწყვილეს, ანი ჯაჯანიძეს ცეკვის წარდგენაში დაეხმარა. სწორედ ამ ნომრის მომზადებისას, ნიკა ცირკის კულისებში ვნახეთ და ბლიც-ინტერვიუც ჩამოვართვით.

- დღეს აქ კონსტანტინე თოლორაიას ცეკვაში ვეხმარები: პარაფსიქოლოგის როლი მაქვს, ადამიანი ტრანსში უნდა შევიყვანო, ჰიპნოზს ვუკეთებ. მოკლედ, კოტიკო ცეკვავს და მე მის პარტნიორს ვამზადებ...

- თვითონ თუ ცეკვავ?

- არა! ზოგადად მოძრაობა კი მიყვარს, მაგრამ ცეკვა არ გამომდის, რაღაც ვერ ვამუღამებ. დადგენილ სტანდარტებს - როდის რამდენი ნაბიჯი უნდა გადავდგა, არ შემიძლია, ყოველთვის უფრო მეტს, უფრო ჩქარა, ნელა ვდგამ. მოკლედ, ისეთ მოძრაობებს ვერ ვაკეთებ, რაც საჭიროა...

- როგორც ჩანს, რიტმს ფეხს ვერ უწყობ...

- კი, ზოგადად ცხოვრების რიტმსაც ვუსწრებ...

ცეკვისას მარჯვნივ რომ უნდა გავშალო ფეხი და წესი ფეხის გაშლას მარცენა მხარეს მკარნახობს, ამის გაკეთება მიჭირს, არ გამომდის, ვერ ვახერხებ...

- ახლა სად ხარ და რას საქმიანობ?

- ვერთობი...

- რაღაც გადაცემაზე ხომ მუშაობდი?

- ახლაც ვმუშაობ, თავისუფალ დროს ვერთობი. ძალიან კომფორტულად ვგრძნობ თავს... ჩემი საყვარელი საქმეა მეგობრებთან ყოფნა... პრინციპში საყვარელი საქმე არც მაქვს... კარგი იქნებოდა, რომ ვიყო მხატვარი, მუსიკოსი, სპორტსმენი ან ფოტოგრაფი...

- ფოტოგრაფობა კი შეგიძლია... რა გიშლის ხელს?

- ადრე მართლა მინდოდა ფოტოგრაფობა, მაგრამ ახლა მაგის დრო არ მაქვს. ისე, ხელში ფოტოაპარატს პროფესიულად თუ ავიღებდი, ფოტოგრაფიაში ალბათ ყველაზე აქტუალურ მიმდინარებას - ტუალეტის ფოტოგრაფიას დავამკვიდრებდი და ჩემს თავს ასე წარვადგენდი. მაგარი იქნებოდა... ვიმუშავებდი კლუბებში, სასტუმროებში და სურათებს ტუალეტში გადავიღებდი... ამ დროს გვერდით ფოტოგრაფს გადაულაპარაკა - ხომ მასწავლი, ჩემი ტუჩებგამოპრუწული ფოტოები ტელეფონით კარგად როგორ გადავიღო?

- მაგარი ფანტაზიორი ხარ...

- ასეა ყოველთვის, ყველანაირი მაგარი იდეა ფანტაზიებში იბადება და იწყება. მერე კი "ფანტაზიები" მილიონებად იქცევა ხოლმე.

- ძველი სამსახური არ გენატრება?

- კი, მაგრამ აღარ არის, მორჩა...

- უკან არავინ დაგაბრუნებს?

- თვითონ იციან... ყველაფერი კარგად არის. კი მენატრება, მაგრამ რაღაც რომ მენატრება ხოლმე, მალე მბეზრდება კიდეც.

ლალი ფაცია