თინა ხიდაშელი - არ არის გამორიცხული, დარჩენილ დროში პრეზიდენტმა განაჩენგამოუტანელი ვანო მერაბიშვილიც შეიწყალოს

"რესპუბლიკური პარტიის" ერთ-ერთი ლიდერის, თინათინ ხიდაშელის შეფასებით, მის თვალში მიხეილ სააკაშვილი იმ ბოროტების მონაა, რომლითაც ის ქვეყანას 9 წლის განმავლობაში მართავდა და რომელ ბოროტებასაც დღემდე ემსახურებდა, - ასე ეხმაურება ხიდაშელი ბაჩო ახალაიას შეწყალების შესახებ მიხეილ სააკაშვილის მიერ მიღებულ გადაწყვეტილებას.

როგორც დეპუტატმა "ინტერპრესნიუსს" განუცხადა, ის ელოდა, რომ მიხეილ სააკაშვილი ახალაიას აუცილებლად შეიწყალებდა. "მიხეილ სააკაშვილმა აუცილებლად უნდა შეიწყალოს ახალაია, სხვა კრიმინალები. ბოლომდე უნდა ჩაყვეს მათ. რადგანაც ეს ადამიანები მისი დავალებით მოქმედებდნენ", - განუცხადა "ინტერპრესნიუსს" ხიდაშელმა.

დეპუტატის თქმით, არც ის არის გამორიცხული, რომ 17 ნოემბრამდე დარჩენილ დროში პრეზიდენტმა განაჩენგამოუტანელი ვანო მერაბიშვილიც შეიწყალოს. "მიხეილ სააკაშვილი ძალიან დიდი ტემპით და მონდომებით აჭედებს იმ პოლიტიკური კუბოს სახურავს, რომელიც მან დიდი ხნის წინ დაიდგა. ვულოცავ და მივესალმები, რომ ვერ გამოვიდა იმ ბოროტებიდან, რომლითაც ქვეყანას 9 წლის განმავლობაში მართავდა", - აცხადებს თინა ხიდაშელი.

"ინტერპრესნიუსი"