ხვდება თუ არა ნუკი კოშკელიშვილი ანდრო ბარნოვს
ხანგრძლივი სატელევიზიო პაუზის შემდეგ ნუკი კოშკელიშვილი ტელეეთერს ცოტა ხნის წინ დაუბრუნდა და "კომედი არხზე" გადაცემა "ფეისბუქი" მიჰყავს. ტელეწამყვანსა და მსახიობზე ათასი ხმა გავრცელდა, რაც, ძირითადად მის სასიყვარულო ურთიერთობებს ეხება. ბოლო ჭორი ისაა, რომ ნუკი მიხეილ სააკაშვილის ადმინისტრაციის ხელმძღვანელ ანდრო ბარნოვს ხვდება. ინტერვიუ მსახიობთან სწორედ ამ ამბით დავიწყეთ.
- ნუკი, გავრცელდა ინფორმაცია, რომ ანდრო ბარნოვს ხვდები. ჩვენი წყაროს ცნობით, რამდენიმე დღის წინ მასთან ერთად ბათუმშიც კი შეგნიშნეს "ბათუმი პლაზაში". რა ურთიერთობა გაქვს ანდრო ბარნოვთან?
- ეგეთი უამრავი ჭორი ვრცელდება, ზოგს ასეთი რამ აღიზიანებს, მე კი - არა. ბუნებრივია, ვიცნობ ანდრო ბარნოვს, "ფეისბუქზეც" მყავს მეგობრებში, მაგრამ სასიყვარულო ურთიერთობა ნამდვილად არ გვაქვს. უბრალოდ, მოვიკითხავთ ხოლმე ერთმანეთს. მის მიმართ კარგად ვარ განწყობილი, მეტი არაფერია... ზოგჯერ ისეთ ვინმეზეც დაუწერიათ, ვისაც საერთოდ არ ვიცნობ. პირად ცხოვრებას რაც შეეხება, ბუნებრივია, ვიღაც მომწონს, მაგრამ სერიოზული ურთიერთობა არავისთან მაქვს. სკანდალურია თუ არა, ჩემს პირად ცხოვრებას არასდროს ვმალავ. ახლა მთლიანად სამსახურზე ვარ გადართული და დროც არ მრჩება პირადი ცხოვრებისთვის.
- რა სახის გადაცემაზე მუშაობ?
- გადაცემას ჰქვია "ფეისბუქი", თუმცა სოციალურ ქსელთან არანაირი შეხება არ აქვს. უბრალოდ, ყურში კარგად მოსახვედრი სახელია და იმიტომ შევარჩიეთ. ჩვენთან უამრავი ადამიანი მოდის სტუმრად, მაგრამ ვსაუბრობთ ისეთ თემებზე, რომელთანაც ჩვენ მიერ მოწვეულ პოპულარულ ადამიანებს არანაირი კავშირი არა აქვს. მაგალითად, ეთერ კაკულია მოვიწვიეთ ახალ ტექნოლოგიებზე სასაუბროდ, ჯიჯი რეჯინი კი - სოფლის მეურნეობაზე. ეს არის გასართობი მინი ტოქ-შოუ. ბევრ სახალისო დავალებას ვაძლევთ სტუმრებს. გადაცემის ჩაწერაზე დასწრება ნებისმიერს შეუძლია. საინტერესო აღმოჩნდა "კომედი შოუს" ბიჭებთან მუშაობა. ბევრს ვხალისობთ, უკვე გავერკვიე, როგორი ფეხბურთი მოსწონთ და ა.შ. აქამდე სულ ქალებთან მიწევდა მუშაობა. რთული ყოფილა კომედის ჟანრის ტოქ-შოუს ათვისება. მიხარია, რომ ჩემს გადაცემას დადებითი გამოხმაურება მოჰყვა. ეტყობა, ხალხი დაიღალა საინფორმაციო და პოლიტიკური გადაცემებით და იმიტომაც გვაქვს რეიტინგი.
- სანამ ეკრანს დაუბრუნდებოდი, რას აკეთებდი?
- ვითამაშე ორ ფილმში. ერთი ფილმი დუტა სხირტლაძემ გადაიღო, რომელიც "ოსკარის" (ფილმი ლუი დე ფიუნესის მონაწილეობით) გადმოქართულებული ვერსიაა. ჩემთან ერთად უამრავი ქართველი ვარსკვლავი თამაშობს. სახალისო ფილმია. დუტამ მოგვცა საშუალება, ჩვენი თავი გამოგვევლინა. ასევე ვითამაშე ფილმში "მისტერ ძიძა", რომელიც "კომედი შოუს" ბიჭებმა გადაიღეს და 12 დეკემბერს მისი პრემიერაა. მართალია, ნახევარწამიანი როლი მაქვს, მაგრამ მაინც მინდოდა ამ ფილმში მონაწილეობა.
- როცა ეკრანიდან გაუჩინარდი, ამბობდნენ, რომ ვანო მერაბიშვილის მხარდასაჭერ კლიპში მონაწილეობის გამო "გბლოკავდნენ"...
- ჩვენ საოცრად დემოკრატიულ ქვეყანაში ვცხოვრობთ და მსგავსი არაფერი მომხდარა. უბრალოდ, შემოქმედებითი პაუზა მქონდა. რაც შეეხება კლიპს, აქ არ იყო ლაპარაკი კონკრეტული პიროვნების მხარდაჭერაზე, მე, როგორც მოქალაქეს, არ მომწონს დაჭერები. მიმაჩნია, რომ საქართველომ კარგი სახელი უნდა მოიხვეჭოს მსოფლიო ასპარეზზე. ეს გარჩევები შიგნით, ქვეყანაში უნდა მოხდეს და არა ისე, რომ პრემიერ-მინისტრი დაიჭირონ და ჩვენ ამით სახელი გავიტეხოთ ყველასთან. ბიძინა ივანიშვილი რომ დაიჭირონ, ანალოგიურ კლიპში მივიღებ მონაწილეობას. ეს იმას არ ნიშნავს, რომ მე არ მაქვს ჩემი პოზიცია, პირიქით, მკაფიოდ გამოხატული პოზიცია მაქვს. მაგრამ არასწორია, როცა ადამიანი საკუთარ მოსაზრებას თავს ახვევს მოსახლეობას. ჩემი მოქალაქეობრივი ვალდებულებაა, მივიდე საარჩევნო უბანზე და გამოვხატო ჩემი არჩევანი. მე ვარ ყველაზე დიდი გულშემატკივარი საქართველოსი! რაც საქართველოსთვის იქნება კარგი, იმას დავუჭერ მხარს, შესაბამისად, რაც კარგია, ის უნდა ავირჩიოთ. ეს კლიპიც ამას ემსახურებოდა, რომ არ არის კარგი ვანოს დაჭერა საქართველოს იმიჯისთვის.
ასევე დაგაინტერესებთ: ნუკი კოშკელიშვილის გამომწვევი ფოტოები აზერბაიჯანული ჟურნალისთვის (+13 PHOTO)
თამარ ბოჭორიშვილი
ყოველკვირეული გაზეთი "ყველა სიახლე"
(გამოდის ოთხშაბათობით)