ფოთში შტორმი 6 ბალს აღწევს

ფოთში ძლიერმა ქარმა ხეები და ელექტროგადამცემი ხაზები დააზიანა, რის გამოც ფოთის რამდენიმე უბანს ელექტროენერგია არ მიეწოდება. "ენერგო-პრო-ჯორჯიას" ჯგუფები შემთხვევის ადგილებზე მუშაობენ და გათიშული აბონენტები ენერგომომარაგებით სავარაუდოდ, დღის ბოლოს ისარგებლებენ.

ადგილობრივ თვითმმართველობაში შექმნილია სპეციალური კომისია, რომელიც ზარალის დათვლაზე მუშაობს. ზარალის ზუსტი ოდენობა ამ დროისთვის უცნობია.

"ამინდი გუშინ გვიან ღამით გაუარესდა, შესაბამისი სამსახურები დილიდანვე მობილიზებულნი იყვნენ. უამინდობამ ქალაქს გარკვეული ზიანი მიაყენა. ამჟამად მიმდინარეობს ტერიტორიების დასუფთავება. შექმნილია სპეციალური კომისიაც, რომელიც ზარალის ზუსტ ოდენობას დაადგენს", - განაცხადა "ინტერპრესნიუსთან" საუბარში, ფოთის მერის მოადგილემ, ლაშა კუპრეიშილმა.

უამინდობისა და ქარის გაძლიერების გამო, მუშაობა დროებით შეაჩერა ფოთის პორტმა. ნავსადგურის ადმინისტრაციის უფროსის, მარიკა ნადარაიას ინფორმაციით, შტორმის სიმძლავრე 5-6 ბალს აღწევს.

"ქარის სიჩქარემ 25 მ/წმ-ს მიაღწია. ასეთ დროს, როგორც ჩვეულებრივ ხდება, პორტი დროებით აჩერებს მუშაობას. გამოდარებისთანავე, ნავსადგური ჩვეულებრივ რეჟიმში გააგრძელებს მუშაობას. რაიმე სახის ზარალი არ დაფიქსირებულა. ჩვენი მონაცემებით, ამ დროისთვის 5-6 ბალიანი შტორმია", - განაცხადა მარიკა ნადარაიამ.

"ინტერპრესნიუსი"