ბესტსელერის "ეშმაკს აცვია პრადა" ქართული თარგმანის პრეზენტაცია დღეს გაიმართება

ლორენ ვაისბერგერის ყველაზე მოდური ბესტსელერის "ეშმაკს აცვია პრადა" ქართული თარგმანის პრეზენტაცია დღეს გაიმართება. როგორც "ინტერპრესნიუსს" "პალიტრა L"-დან აცნობეს, წიგნის პრეზენტაცია ჟურნალ "და ქალის" ახალი ნომრის პრეზენტაციასთან ერთად, კაფე "როტონდაში" გაიმართება.

დღევანდელ საღამოს გამომცემლობა წიგნს ფასდაკლებით გაყიდის.

მთელ მსოფლიოში ცნობილი პერსონაჟებისა, მირანდასა და ენდის ქართულად "ამეტყველების" იდეა გამომცემლობა "პალიტრა L"-ს ეკუთვნის.

კომედიური დრამა, რომელმაც მსოფლიო მაყურებელი მოდის მაღალი ეშელონების კულუარებში შეახედა, ლორენ ვაისბერგერს ეკუთვნის. მწერალმა წიგნი საკუთარ ბიოგრაფიაზე დაყრდნობით დაწერა. მან ამერიკული "ვოგის" ყოვლისშემძლე და გავლენიანი რედაქტორის, ანა ვინტურის ასისტენტად მუშაობის მწარე გამოცდილება ფურცლებზე გადაიტანა.

"ინტერპრესნიუსი"

იხილეთ ასევე: როგორ არჩევს კადრებს "ვოგის" მთავარი რედაქტორი