ამაღამ მთელ საქართველოში ამინდის მკვეთრი გაუარესებაა მოსალოდნელი. როგორც "ინტერპრესნიუსს" გარემოს ეროვნული სააგენტოს მონიტორინგისა და პროგნოზირების ცენტრის ჰიდრომეტეოლოგიური სამსახურის უფროსმა სვეტლანა ნიორაძემ განუცხადა, ამაღამ მთელ საქართველოში ძლიერი ქარი და წვიმა, მთაში და მაღალმთაში კი თოვლია მოსალოდნელი.
ამაღამ თბილისში ქარის სიჩქარე დროგამოშვებით წამში 30 მეტრს მიაღწევს, ძლიერი ქარი და თოვლჭყაპი თბილისში ხვალაც შენარჩუნდება. მაღალმთაში კი მოსალოდნელია ქარბუქი.
ხვალ, მთელს საქართველოში დღისით საშუალო ტემპერატურა +1; +6 გრადუსი იქნება. 31 მარტს და 1 აპრილს კი, ღამით ყინვაა მოსალოდნელი. ჰაერის ტემპერატურა დასავლეთ საქართველოში -3;-6 გრადუსი, ხოლო აღმოსავლეთ საქართველოში -4;-6 გრადუსი იქნება.
სვეტლანა ნიორაძის განცხადებით, ასეთი დაბალი ტემპერატურა საშიშია უკვე ყვავილობაში მყოფი ნაადრევი ჯიშის ხეხილისთვის, რაზეც შესაბამის სამსახურებს ინფორმაცია მიაწოდეს.
ამასთან, წვიმაა მოსალოდნელი 2 აპრილსაც. 3 აპრილიდან კი მთელს საქართველოში გამოიდარებს.