საკონსტიტუციო სასამართლოს თავმჯდომარის მანქანას ბათუმში კვერცხები ესროლეს

ბათუმში, საკონსტიტუციო სასამართლოს თავმჯდომარის, გიორგი პაპუაშვილის ავტომობილზე ცოცხები დააწყვეს და კვერცხები ესროლეს . პოლიტპატიმრის სტატუსით გათავისუფლებულმა ჯემალ დუაძემ საკონსტიტუციო სასამართლოს მიერ საზოგადოებრივი მაუწყებლის მრჩეველთა საბჭოს წევრების შესახებ გამოტანილი გადაწყვეტილება გააპროტესტა.

როგორც ჯემალ დუაძემ განაცხადა, საკონსტიტუციო სასამართლომ ანტისახელმწიფოებრივი გადაწყვეტილება მიიღო.

"საკონსტიტუციო სასამართლომ დღეს მიიღო ანტისახელმწიფოებრივი გადაწყვეტილება. საზოგადოებრივი მაუწყებლის ძველ შემადგენლობას აღუდგინა უფლებამოსილება. ვთვლით, რომ ეს არის საბოტაჟი. ის პირები პოლიტიკური ნიშნით იყვნენ ბოკერიას და ადეიშვილის მიერ დანიშნული. გიორგი პაპუაშვილს მივაკითხეთ დღეს რესტორანში, რომელმაც გარეთ გამოსვლის შემდეგ მოგვაყენა შეურაცხყოფა, შეგვაგინა. ამას არ ვაპატიებთ!", - აღნიშნა ჯემალ დუაძემ.

ბათუმში საკონსტიტუციო სასამართლოსთან მობილიზებულია საპატრულო პოლიცია.

"ინტერპრესნიუსი"