სარფში ასლან აბაშიძის დაცვის უფროსი დააკავეს

ქართველმა სამართალდამცავებმა ასლან აბაშიძის დაცვის უფროსი დავით ხალვაში (მეტსახელად "ქელფეთა") დააკავეს. როგორც "ინტერპრესნიუსისთვის" გახდა ცნობილი, ხალვაში 22 აპრილს, საქართველოში სარფის საბაჟოს გავლით ბრუნდებოდა, სამართალდამცავებმა ადგილზევე დააკავეს და ციხეში გადაიყვანეს.

დავით ხალვაში შემდეგი ბრალდებებით იძებნებოდა - უკანონო შეიარაღებული ფორმირების შექმნა და ხელმძღვანელობა, ჟურნალისტისთვის პროფესიულ საქმიანობაში უკანონოდ ხელის შეშლა, შეკრებისა და მანიფესტაციის უფლების ხელყოფა, თავისუფლების უკანონო აღკვეთა, საზოგადოებრივი წესრიგის დამრღვევი ჯგუფური მოქმედების ორგანიზება, ძარცვა, დიდი ოდენობით ქონების მითვისება და ჯგუფურად არაერთგზის ჩადენილი გამოძალვა.

ამასთან, დავით ხალვაშის დაკავების შესახებ ინფორმაცია "ინტერპრესნიუსს" შინაგან საქმეთა სამინისტროს საზოგადოებასთან ურთიერთობის სამსახურის ხელმძღვანელმა ნინო გიორგობიანმა დაუდასტურა.

დავით ხალვაშმა საქართველო, ასლან აბაშიძესთან ერთად, 2004 წელს დატოვა.

"ინტერპრესნიუსი"