ერეკლე კოდუას ძმა საავადმყოფოში ნაცემი მიიყვანეს - დავით კოდუას ახლობლები თავდასხმის დეტალებზე

ბიზნესმენ დავით კოდუას ახლობლების ინფორმაციით, იგი თბილისში, აბაშიძის ქუჩაზე ნიღბიანებმა სცემეს. როგორც "ინტერპრესნიუსს" დავით კოდუას დედამ, ლაურა ღაჭავამ განუცხადა, იგი უცხოეთში იმყოფება და არ იცის, მისი შვილი ცოცხალია თუ არა.

ამასთან, ოჯახის ახლობლის ინფორმაციით, დავით კოდუას ვაკეში, აბაშიძის ქუჩაზე ნიღბიანები თავს დაესხნენ და იგი 3-4-მა ადამიანმა სცემა. მომხდართან დაკავშირებით, ახლობლებისთვის დამატებითი დეტალები უცნობია.

ძებნაში მყოფი ერეკლე კოდუას ძმა, ბიზნესმენი დავით კოდუა რკინიგზის საავადმყოფოშია მოთავსებული. საავადმყოფოში აცხადებენ, რომ დავით კოდუა კლინიკაში დღეს, დაახლოებით 15.00 საათზე მოათავსეს.

რკინიგზის საავადმყოფოსთან კოდუას ახლობლები და მეგობრები არიან შეკრებილი. თუმცა, ისინი მომხდარის შესახებ კომენტარს არ აკეთებენ.

ვრცელდება ინფორმაცია, რომ ამ წუთებში კოდუას პირველადი სამედიცინო დახმარება უტარდება.

ამასთან, შსს-ს ცნობით, დავით კოდუას ცემის ფაქტთან დაკავშირებით საგამოძიებო მოქმედებები მიმდინარეობს.

"მიმდინარეობს საგამოძიებო მოქმედებები და გაკეთდება ყველაფერი, რასაც აღნიშნული მოიცავს", - აცხადებენ შსს-ში.

მათივე განმარტებით, აღნიშნულთან დაკავშირებით უწყება დეტალურ ინფორმაციას მოგვიანებით გაავრცელებს.

"ინტერპრესნიუსი"

იხილეთ აუდიო