გამოკითხულთა 49% მიიჩნევს, რომ საპარლამენტო არჩევნების შემდეგ სამუშაო ადგილების რაოდენობა იგივე დარჩა

ეროვნულ-დემოკრატიული ინსტიტუტის, NDI-ის გამოკითხულთა უმრავლესობა - 49% მიიჩნევს, რომ 2012 წლის საპარლამენტო არჩევნების შემდეგ სამუშაო ადგილების რაოდენობა საქართველოში იგივე დარჩა.

ამასთან, გამოკითხულთა 43% აცხადებს, რომ სამუშაო ადგილების რაოდენობა შემცირდა, 3% მიიჩნევს, რომ გაიზარდა. გამოკითხულთა 5%-ს კი აღნიშნულ კითხვაზე პასუხი არ აქვს.

აღსანიშნავია, რომ NDI-ის წინა კვლევაში, რომელიც გასული წლის ნოემბერში ჩატარდა, 4% აცხადებდა, რომ სამუშაო ადგილების რაოდენობა გაიზარდა, 63% - იგივე დარჩა, 22% - შემცირდა.

კვლევის საველე სამუშაოები 26 მარტიდან 18 აპრილის პერიოდში ჩატარდა და 3 942 ადამიანი გამოიკითხა.

"ინტერპრესნიუსი"