5 წლის ასაკის ბავშვებისათვის სკოლისთვის მომზადების ხელშეწყობის პროგრამა შემუშავდება
5 წლის ასაკის ბავშვებისათვის სკოლისთვის მომზადების ხელშეწყობის პროგრამა შეიქმნება. ამის შესახებ "ინტერპრესნიუსს" საქართველოს განათლებისა და მეცნიერების სამინისტროდან აცნობეს.
განათლების სამინისტროს ინფორმაციით, სკოლისათვის მზაობის ხელშეწყობის პროგრამას სამინისტრო 5 წლის ასაკის ბავშვებისათვის განახორციელებს.
"პროგრამის ფარგლებში, სკოლისთვის მზაობის სასწავლო-სააღმზრდელო მეთოდოლოგიური მასალა შეიქმნება, რომელიც შესაბამისობაში იქნება ეროვნული სასწავლო გეგმის პირველი კლასის პროგრამასთან. მასში ყურადღება გამახვილდება ბავშვის ყოველმხრივ განვითარებასა და სკოლისთვის მზაობის უნარ-ჩვევების ფორმირებაზე", - აცხადებენ სამინისტროში.
მათივე განცხადებით, პროექტის განხორციელების ფარგლებში, საქართველოში საერთაშორისო ექსპერტი სტეფან საიფერი იმყოფება, რომელიც ქართველი ავტორებისათვის სემინარებს მართავს. უცხოელი ექსპერტი ქართველ სპეციალისტებს კონსულტაციებს სკოლისათვის მზაობის კურიკულუმის შექმნის პრინციპებთან და სხვა მნიშვნელოვან საკითხებთან დაკავშირებით უწევს.
"სკოლამდელი აღზრდის სპეციალისტები ეცნობიან და აანალიზებენ ევროპისა და ამერიკის სკოლამდელი განათლების წარმატებულ სასწავლო პროგრამებს, რათა მათი მოწინავე პრაქტიკა ადაპტირებული იყოს ქართულ რეალობასთან და გამოყენებული იქნას აღნიშნულ კურიკულუმში", - განმარტეს სამინისტროში.
ექსპერტის ვიზიტის ფარგლებში დაგეგმილი ღონისძიებების მხარდამჭერი ორგანიზაციები არიან World Vision და ფონდი "ღია საზოგადოება-საქართველო" (OSGF).
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
