ნოდარ ხადური აპრილში დაბალ ეკონომიკურ მაჩვენებელს კაზინოებში და სათამაშო ბიზნესში შემცირებულ ბრუნვებს უკავშირებს

საქართველოს ფინანსთა მინისტრი ნოდარ ხადური აპრილის თვეში დაფიქსირებულ დაბალ ეკონომიკურ მაჩვენებელს კაზინოებში და სათამაშო ბიზნესში შემცირებულ ბრუნვებს უკავშირებს. ამის შესახებ ნოდარ ხადურმა ჟურნალისტებს მთავრობის სხდომის დასრულების შემდეგ განუცხადა. ამით მინისტრი კითხვას გამოეხმაურა, რით ხსნიდა იმას, რომ აპრილის თვეში 2,7% - იანი ეკონომიკური ზრდა დაფიქსირდა.

"დარგობრივი ანალიზის გაკეთება ძალიან რთულია. მაგრამ, მე მაინც გეტყვით - ის, რომ არ არის მაღალი ზრდა, გამოწვეულია კაზინოებში და სათამაშო ბიზნესში შემცირებული ბრუნვებით. მე შემიძლია ეს ოფიციალურადაც გამოგიქვეყნოთ, მაგრამ ამაზე დაწვრილებით სამშაბათს დაგეგმილ ბრიფინგზე გესაუბრებით", - განაცხადა ნოდარ ხადურმა.

"ინტერპრესნიუსი"