სასჯელთა შეკრებითობის პრინციპი შესაძლოა კვლავ ამოქმედდეს

სასჯელთა შეკრებითობის პრინციპი შესაძლოა კვლავ ამოქმედდეს. კანონპროექტს იუსტიციის სამინისტრო ამზადებს. როგორც უწყებაში განმარტავენ, პროექტის მომზადება დღის წესრიგში სასამართლო პრაქტიკის და იმ პრობლემების გათვალისწინებით დადგა, რაც სასჯელთა შეკრებითობის პრინციპის გაუქმებამ და ძალაში მხოლოდ შთანთქმის პრინციპის დატოვებამ გამოიწვია. მათივე თქმით, პროექტის გათვალისწინებით, შეკრებითობის პრინციპის გამოყენება ავტომატურად არ მოხდება და მოსამართლეებს საშუალება ექნებათ, თავად აირჩიონ, რა ნორმას მიმართონ.

"იუსტიციის სამინისტრო თავიდანვე იყო უპირობო შეკრებითობის პრინციპის არსებობის წინააღმდეგი, რაც შეიცვალა და დღეს აღარ მოქმედებს. რაც შეეხება იმას, თუ რატომ არ უნდა იყოს მხოლოდ შთანთქმის პრინციპი და რატომ არის მიზანშეწონილი როგორც შთანთქმის, ასევე ნაწილობრივი, ან სრულად შეკრებითობის პრინციპი რომ არსებობდეს - პირველი ეს არის პრაქტიკაში ნაჩვენები პრობლემები. ჩვენ უპირობო შეკრებითობის პრინციპს არ ვუბრუნდებით. უბრალოდ, მოსამართლეს საშუალება ექნება ორივე გამოიყენოს. რაც ყველაზე მნიშვნელოვანია - კანონის ფუძემდებლური პრინციპია, რომ მოხდეს სასჯელის ინდივიდუალიზაცია", - განმარტავენ იუსტიციის სამინისტროში.

სასჯელთა შეკრებითობის პრინციპი პარლამენტმა გასულ წელს გააუქმა.

"ინტერპრესნიუსი"