გიგი უგულავა გლდანის ციხიდან ე.წ. მატროსოვის ციხეში გადაიყვანეს

5 ივლისს, გვიან ღამით, ბრალდებული გიორგი უგულავა სასჯელაღსრულების N8-ე დაწესებულებაში სახალხო დამცველის რწმუნებულებმა მოინახულეს, - ამის შესახებ "ინტერპრესნიუსს" ომბუდსმენის აპარატოდან აცნობეს.

"ბრალდებულის განმარტებით, მოთავსებული იყო დაწესებულების საკარანტინო ნაწილის საკანში. როგორც გიორგი უგულავამ, ასევე დაწესებულების ადმინისტრაციამ განმარტა, პოლიციის ყოფილი თანამშრომლების განთავსების კორპუსში ბრალდებულის გადაყვანის მცდელობას N8-ე დაწესებულებაში მყოფ პატიმართა მხრიდან ხმაური მოჰყვა, რის შემდგომაც ის კვლავ საკარანტინო ნაწილში დააბრუნეს.

ბრალდებულმა გიორგი უგულავამ სახალხო დამცველის რწმუნებულებს განუცხადა, რომ ის უარს აცხადებდა საკვების მიღებაზე და ითხოვდა სასჯელაღსრულების N9-ე დაწესებულებაში გადაყვანას, ვინაიდან N8-ე დაწესებულებაში თავს უსაფრთხოდ არ გრძნობდა. სახალხო დამცველის რწმუნებულები გიორგი უგულავას გადაყვანის საკითხთან დაკავშირებით გაესაუბრნენ დაწესებულების დირექტორის მოადგილეს, რომელმაც თავის მხრივ დაადასტურა ბრალდებულ გიორგი უგულავას N9-ე დაწესებულებაში გადაყვანის აუცილებლობა. როგორც დღეს დილით N8-ე დაწესებულების დირექტორის მოადგილესთან სატელეფონო საუბრით გაირკვა, გიორგი უგულავა გამთენიისას სასჯელაღსრულების N9-ე დაწესებულებაში გადაიყვანეს. ამ წუთებში სახალხო დამცველის რწმუნებულები ბრალდებულ გიორგი უგულავას მონახულების მიზნით N9-ე დაწესებულებაში იმყოფებიან.

"ინტერპრესნიუსი"