ბაჩო ახალაია - ირაკლი ბათიაშვილი ციხეში მიხეილ სააკაშვილის სადღეგრძელოს სკამზე ასული სვამდა

ირაკლი ბათიაშვილი ციხეში მიხეილ სააკაშვილის სადღეგრძელოს სკამზე ასული სვამდა, - ამის შესახებ, ნავთლუღის სპეცოპერაციის საქმეზე ბრალდებულმა ბაჩო ახალაიამ დღეს, თბილისის საქალაქო სასამართლოში განაცხადა და განმარტა, რომ ტელეფონი და სხვა პრივილეგიები, რასაც ბრალდება მას ედავება, არა მხოლოდ გირგვლიანის საქმეზე მსჯავრდებულებს, არამედ სხვა პატიმრებსაც გააჩნდათ, რადგან მაშინ კანონი ამას არ კრძალავდა.

"მაშინ ტელეფონი არ იყო აკრძალული და მე დავაწესე ეს აკრძალვა", - განაცხადა ბაჩო ახალაიამ #10 დაწესებულების ყოფილი და #9 დაწესებულების მოქმედი თანამშრომლის, რამაზ ჭოხონელიძის დაკითხვისას, რომელიც პროკურატურის მოწმეა.

"ირაკლი ბათიაშვილს შენს ციხეში სკამზე ასულს მიხეილ სააკაშვილის სადღეგრძელო დაულევია", - მიმართა ახალაიამ მოწმეს.

ბათიაშვილის შესახებ, იგივე განაცხადა გუშინ დაკითხულმა მოწმემ – მიხეილ ბიბილურიძემ, რომელიც გირგვლიანის საქმეზეა გასამართლებული და სასჯელს სწორედ #10 დაწესებულებაში იხდიდა.

რაც შეეხება დღევანდელ პროცესს, ნავთლუღის სპეცოპერაციის საქმეზე, რომელიც მოიცავს გირგვლიანის მკველობისთვის მსჯავრდებულების მიმართ ციხეში პრივილეგირებულად ყოფნის ეპიზოდს, დღეს ციხის ყოფილი თანამშრომლები დაიკითხებიან. ჭოხონელიძის გარდა, კიდევ 6 პირის დაკითხვაა დაგეგმილი. აღნიშნულ ეპიზოდში ბაჩო ახალაიაა ბრალდებული.

ბრალდების მასალების მიხედვით, პრივილეგირებულ მდგომარეობაში გირგვლიანის საქმეზე მსჯავრდებულები სწორედ ახალაიას დავალებით იმყოფებოდნენ, რომელიც იმ დროისთვის სასჯელაღსრულების დეპარტამენტის თავმჯდომარე იყო. ამ ეპიზოდზე, სასამართლოში, სავარაუდოდ მიმდინარე კვირაში იგეგმება #10 დაწესებულების ყოფილი დირექტორის, თემურ ტაბაღუას დაკითხვაც, რომელიც ამჟამად სასულიერო პირია.

"ინტერპრესნიუსი"