ოკუპირებულ აფხაზეთში ე.წ. საპრეზიდენტო არჩევნები მიმდინარეობს

ოკუპირებულ აფხაზეთში ე.წ. საპრეზიდენტო არჩევნები მიმდინარეობს. სააგენტო "აპსნიპრესის" ინფორმაციით, რეგიონის მასშტაბით 154 საარჩევნო უბანი 08:00 საათზე გაიხსნა, ასევე გახსნილია სამი საარჩევნო უბანი საზღვარგარეთ – მოსკოვში, ჩერკესკსა და სტამბოლში. "პრეზიდენტობისთვის" ოთხი კანდიდატი - ასლან ბჟანია, ლეონიდ ძაპშბა, მირაბ ქიშმარია და რაულ ხაჯიმბა - იბრძვის.

კანდიდატებიდან პირველმა ხმა რაულ ხაჯიმბამ, სოხუმის 14-ე საშუალო სკოლაში გახსნილ უბანში მისცა. მისი თქმით, "კენჭისყრის შედეგები ისეთი იქნება, როგორიც ხალხს უნდა".

"არჩევნებისგან ჩვენ გამარჯვებას ველით", - განაცხადა ხაჯიმბამ.

რიგგარეშე ე.წ. საპრეზიდენტო არჩევნები ოკუპირებულ აფხაზეთში მას შემდეგ დაინიშნა, რაც ოპოზიციის მიტინგების ფონზე დე ფაქტო პრეზიდენტი ალექსანდრე ანქვაბი თანამდებობიდან გადადგა.

აფხაზური მედიის ინფორმაციით, აფხაზეთის ე.წ. საპრეზიდენტო არჩევნებზე დამკვირვებლები 24 ქვეყნიდან, მათ შორის, რუსეთიდან, სომხეთიდან და იაპონიიდან არიან ჩასულები.

კერძოდ, "აპსნიპრესის" ინფორმაციით, აფხაზეთის დე ფაქტო პარლამენტის მიწვევით, ე.წ. საპრეზიდენტო არჩევნებზე დასაკვირვებლად 24 ქვეყნიდან 100-მდე საერთაშორისო დამკვირვებელი ჩავიდა.

"საუბარია სულ 22 დელეგაციაზე საერთაშორისო ორგანიზაციებიდან, რუსეთის სახელმწიფო ორგანოებიდან, ნაურუს რესპუბლიკიდან, სამხრეთ ოსეთიდან, დნეპრისპირეთიდან, ყარაბაღის რესპუბლიკიდან, დონეცკის სახალხო რესპუბლიკიდან, ასევე რუსეთის, სომხეთის, იაპონიისა და სხვა ქვეყნების საზოგადოებრივი ორგანიზაციებიდან. დამკვირვებლებს შორის არიან ბელორუსისა და რუსეთის საპარლამენტო ჯგუფების წარმომადგენლები, დამოუკიდებელ სახელმწიფოთა თანამეგობრობის საპარლამენტთაშორისო ასამბლეის წარმომადგენლები და სხვა. დამკვირვებლებს შორის არიან იტალიის, ბელგიის, ლუქსემბურგის, დიდი ბრიტანეთის, სან მარინოს, უკრაინის, გერმანიის, საფრანგეთის, ფინეთის, ინდოეთის, ბრაზილიის, ჩეხეთის, ბულგარეთისა და ლიტვის მოქალაქეები", - წერს "აპსნიპრესი" აფხაზეთის დე ფაქტო პარლამენტის სპიკერის მთავარ მრჩეველ, გალინა სტრანიჩკინაზე დაყრდნობით.

ოკუპირებულ აფხაზეთში ე.წ. საპრეზიდენტო არჩევნები მიმდინარეობს. რიგგარეშე ე.წ. საპრეზიდენტო არჩევნები ოკუპირებულ აფხაზეთში მას შემდეგ დაინიშნა, რაც ოპოზიციის მიტინგების ფონზე დე ფაქტო პრეზიდენტი ალექსანდრე ანქვაბი თანამდებობიდან გადადგა.

"ინტერპრესნიუსი"