ზურაბ ვარაზაშვილი - საყდრისის უბანზე საინჟინრო-გეოლოგიური პირობები ადამიანის საქმიანობისთვის საშიშია
საყდრისი-ყაჩაღიანის მაღაროს საინჟინრო-გეოლოგიური დასკვნის ავტორის ზურაბ ვარაზაშვილის თქმით, ყაჩაღიანის უბანზე საინჟინრო-გეოლოგიური პირობები ადამიანის საქმიანობისთვის საშიშია. როგორც "ინტერპრესნიუსს" ვარაზაშვილმა განუცხადა, მას არ გააჩნია შესაბამისი კომპეტენცია და კომენტარს ვერ გააკეთებს არქეოლოგიური და ისტორიული თვალსაზრისით მიმდინარე დავებზე, თუმცა ობიექტი საინჟინრო-გეოლოგიური კუთხით შესწავლილი აქვს.
"საინჟინრო-გეოლოგიური კუთხით ეს არის ძალიან რთული უბანი, სადაც ძალიან ღრმა ტექტონიკური რღვევებია, რომლებმაც ამ მასივის სირთულე განაპირობა. იქ არის ღია ნაპრალები, რომელთა სიღრმე არ არის გამოკვლეული და ქმნის ძალიან დიდ საფრთხეს ადამიანების იქ საქმიანობის თვალსაზრისით. შევხვდებით ისეთ ადგილებს, სადაც ლოდები თითქმის მოძრავ მდგომარეობაშია, რაც ქვათაცვენას იწვევს და საშიშია იქ ადამიანის საქმიანობისთვის. ორი შტოლნა, რომელიც მე დავათვალიერე, ჩამონგრევის პირზეა და ესეც თავისებურ საფრთხეს წარმოშობს. გარდა ამისა, იქ არის ტექნოგენური ჩარევები ადამიანის, შეყვანილია გზები, რამაც გამოიწვია ფერდობების მოჭრა. ეს არღვევს ფერდობის მდგრადობას და შეიძლება ქანების დაცურება განვითარდეს. ეს ყველაფერი ქმნის საერთო სურათს, რომ საინჟინრო-გეოლოგიური პირობები იქ ძალიან რთულია. საინჟინრო-გეოლოგიური პირობების მიხედვით საკვლევი უბნები სამ კატეგორიად იყოფა: პირველი, მეორე და მესამე. მესამე არის ყველაზე რთული კატეგორია, რომელშიც ყაჩაღიანის უბანი ექცევა. აქედან გამომდინარე, ამ საფრთხეებიდან გამომდინარე, რომლებიც საინჟინრო-გეოლოგიური თვალსაზრისით არსებობს, უკვე უნდა იმუშაოს ჯგუფმა, რომელიც საფრთხეების შეჩერების და რეგულაციის გეგმას შეიმუშავეს", - განაცხადა ვარაზაშვილმა და დასძინა, რომ პრობლემების თავიდან ასაცილებლად ძალიან სწორად უნდა იყოს შერჩეული დამცავი ღონისძიებები.
რაც შეეხება ყაჩაღიანის უბნის დამუშავებას ოქროს მოპოვების თვალსაზრისით, ვარაზაშვილის თქმით, ყველანაირი უბნის დამუშავება შეიძლება თუ უსაფრთხოების ზომები მიღებულია. აქედან გამომდინარე, მისი აზრით, აუცილებლად უნდა ჩატარდეს გარემოზე ზემოქმედების შეფასება, რომლის საფუძველზეც დაგეგმილი ღონისძიებები ძალიან კარგად უნდა იყოს გათვლილი.
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
