პატრიარქი - 37 წლის მანძილზე ჩემში არასდროს სასოწარკვეთილება არ ყოფილა
37 წლის მანძილზე არასდროს სასოწარკვეთილება არ ყოფილა ჩემში, მე ვხედავდი ღვთის წყალობას, - ამის შესახებ სრულიად საქართველოს კათოლიკოს-პატრიარქმა სვეტიცხოველში ქადაგებისას განაცხადა.
სვეტიცხოვლის საკათედრო ტაძარში საღმრთო ლიტურგია დასრულდა. წირვის დასრულების შემდეგ სრულიად საქართველოს კათოლიკოს-პატრიარქმა ტაძარში შეკრებილებს ტრადიციული ქადაგებით მიმართა. უწმინდესის ქადაგებამდე შეკრებილებს ამბა ალავერდელმა, მიტროპოლიტმა დავითმა მიმართა. მან მადლობა შეწირა უფალს პატრიარქის კურთხევისათვის და სრულიად საქართველოს კათოლიკოს-პატრიარქის ცხოვრების დეტალები გაიხსენა. მიტროპოლიტმა პატრიარქის მოღვაწეობის ეპოქა გაიხსენა და მას მზიანი ღამე უწოდა.
"ჩვენ ამ ღამეში დიდმა და პატარამ ერთად ვიარეთ და მზიან ნათელში მიგვიყვანა", - აღნიშნა მიტროპოლიტმა დავითმა.
მეუფე დავითის შემდეგ უწმინდესს საქართველოს პრემიერ-მინისტრმა, ირაკლი ღარიბაშვილმა ამბიონიდან მიმართა და აღსაყდრების 37-ე წელი მიულოცა. პრემიერმა აღნიშნა, რომ ქართველმა ხალხმა ამ 37 წლის განმავლობაში ურთულესი განსაცდელები გამოიარა. მისივე თქმით, პატრიარქი ერისათვის იმედთან ასოცირდება, ერისთვის კაცთმოყვარეობის, მიმტევებლობის, მამულიშვილური სიყვარულის მაგალითია.
პრემიერის შემდეგ ტაძარში შეკრებილებს კათოლიკოს-პატრიარქმა მიმართა და ქადაგება სიტყვებსი - "ჩვენთან არს ღმერთი" განმარტებით დაიწყო.
"ეს სიტყვები სწერია ბიბლიაში და მოსვლისთანავე, 1977 წლის 25 დეკემბერს, მე ვგრძნობდი, რომ ჩვენთან არს ღმერთი. მე ვგრძნობდი, ვხედავდი იმ გაჭირვებას, რომელშიდაც იყო საქართველო და ჩვენი ეკლესია. ამავე დროს, მე ვხედავდი, რომ ჩვენ ძალიან ახლოს ვიყავით ღმერთთან და ღმერთი იყო ჩვენთან ახლოს. ამიტომ ამ 37 წლის მანძილზე არასდროს სასოწარკვეთილება არ ყოფილა ჩემში. მე ვხედავდი ღვთის წყალობას, იმ მადლს, რომელიც მოეფინება და, რომელიც ეფინება საქართველოს. ბიბლიაში წერია, ვინც ღმერთს უყვარს, იმას უგზავნის განსაცდელებს, წმინდა მამები როდესაც ცხოვრობდნენ უდაბნოში და განსაცდელში არ იყვნენ, წუხდნენ, ღმერთმა დაგვიგვიწყაო. ღმერთმა არ დაგვყივიწყა და არასდროს არ დაგვივიწყებს იმიტომ, რომ "ღმერთი ხედავს გულსა კაცისასა". ქართველი ადამიანი დაჯილდოებულია მოწყალე და მოსიყვარულე გულით", - აღნიშნა უწმინდესმა.
პატრიარქმა წმინდა იოანე ღვთისმეტყველის სიტყვები მოიშველია და განაცხადა: ღმერთი არის სიყვარული. უწმინდესის თქმით, უფალმა ქართველებს სიყვარულის ნიჭი, მადლი უბოძა.
"ეს სიყვარული და ძალა ღვთისა მუდამ დაიფარავს საქართველოს ხილული და უხილავი მტრებისაგან. 37 წელი მძიმე იყო, იყო მზიანი ღამე, მაგრამ იმედს, მზეს ვხედავდი, მადლობა უფალს ამ იმედისათვის. წყალობა ღვთისა, მადლი ღვთისა ყოველთვის გვფარავს"- აღნიშნა უწმინდესმა.
პატრიარქის თქმით, ჩვენ შევთხოვთ უფალს, ღვთის მადლი და სიყვარული მოფინოს საქართველოს ღვთისმშობლის მეოხებით. უწმინდესმა ისურვა, ღმერთმა დაიფაროს, დაიცვას სრულიად საქართველო და საქართველოს მთავრობა.
სვეტიცხოველში დღეს წმინდა სპირიდონ ტრიმიფუნტელის და პატრიარქის აღსაყდრების 37 წელთან დაკავშირებით სადღესასწაულო წირვა გაიმართა. წირვას პრემიერ-მინისტრი, ფინანსთა მინისტრი, ასევე სხვადასხვა ეკლესია-მონასტრებიდან სასულიერო პირები და ბერ-მონაზვნები ესწრებოდნენ.
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
