ფრაქცია "ქართული ოცნება" 6 თებერვალს ქუთაისში მომხდარ ავტოავარიასთან გუგული მაღრაძის კავშირს კატეგორიულად უარყოფს

ფრაქცია "ქართული ოცნება" 6 თებერვალს ქუთაისში მომხდარ ავტოავარიასთან დეპუტატ გუგული მაღრაძის კავშირს კატეგორიულად უარყოფს და აცხადებს, რომ ადგილი აქვს მიზანმიმართულ ცილისწამებას.

"ქართული ოცნება" სამართალდამცავ ორგანოებს ცილისწამების ფაქტის გამოძიებას სთხოვს.

"17 თებერვალს მედია-საშუალებით გაავრცელა ინფორმაცია, რომ 6 თებერვალს ქუთაისში მომხდარი ავტოშემთხვევის შედეგად გარდაცვლილი ნანა გიგლემიანის ახლობლები საპარლამენტო უმრავლესობის წევრს, გუგული მაღრაძეს ადანაშაულებენ, რადგან მათ მიიღეს ინფორმაცია, თითქოს მანქანას ქერათმიანი ქალი მართავდა, რომლის სახელია გულო და ისინი მიიჩნევენ, რომ ეს ქალბატონი გუგული მაღრაძეა. ვაცხადებთ, გუგული მაღრაძე 6 თებერვალს თბილისში იმყოფებოდა და აღნიშნული ინფორმაცია სიმართლეს არ შეესაბამება. ადგილი აქვს მიზანმიმართულ ცილისწამებას საქართველოს პარლამენტის უმრავლესობის წევრის მიმართ", - ნათქვამია განცხადებაში, რომელსაც ფრაქცია "ქართული ოცნების" აპარატი ავრცელებს.

"ინტერპრესნიუსი"