რამდენ ფულს შოულობენ "მარშრუტკის" მძღოლები და გაიაფდება თუ არა მგზავრობის საფასური საწვავის მსგავსად

საწვავის გაიაფებამ მიკროავტობუსის მგზავრებისთვის ტარიფი ვერ შეამცირა, თუმცა მძღოლებს დღიური გეგმური გადასახადი გაუზარდა. სამარშრუტო ტაქსების მძღოლები ამბობენ, რომ შპს "თბილისის მიკროავტობუსმა" გადასახადის გაძვირების მიზეზად დოლარის კურსის ზრდა და ბენზინის გაიაფება დაასახელა.

"ისედაც მცირე შემოსავალი გვაქვს და კიდევ გადასახადის გაძვირება გვინდა?", -აცხადებენ მძღოლები და ამბობენ, რომ გაუსაძლის პირობებში უწევთ მუშაობა.

მიკროავტობუსის მძღოლების ინფორმაციით, ბოლო 1 წლის განმავლობაში გეგმური გადასახადი 3-ჯერ გაეზარდათ.

"როგორც კი მუშაობა გაუმჯობესდება, გეგმას გვიმატებენ. უარი ვუთხარი დამატებული საფასურის გადახდაზე, მაგრამ როდესაც ავტოპარკში მივედი, გეგმური მაინც გაძვირებული დამხვდა. არ ვიცი, ამ პრობლემასთან დაკავშირებით ვის მივმართო", - აცხადებს ერთ-ერთი მიკროავტობუსის მძღოლი.

მათი ინფორმაციით, თბილისის სატრანსპორტო კომპანიაში მძღოლების პრობლემებს არ ისმენენ.

"გარდა გეგმური გადასახადის დამატებისა, სხვა პირობებიც ამძიმებს ჩვენს მდგომარეობას, მანქანები უკვე ხანდაზმულია და ხშირად საჭიროებს შეკეთებას. ამის ფულს ჩვენი ჯიბიდან ვიხდით", - ამბობენ მძღოლები.

მძღოლები აცხადებენ, რომ თუ მთავრობა ქმედით ნაბიჯებს არ გადადგამს, საპროტესტო აქციებს დაიწყებენ.

მათი ინფორმაციის გადამოწმება გლდანის ავტოსადგომზე ვცადეთ. ავტოპარკის ხელმძღვანელი ჩვენთან შესახვედრად არ გამოვიდა, თუმცა სატელეფონო საუბრის დროს განგვიმარტა, რომ ცოტა ხანში შეძლებდა ჩვენთვის ინფორმაციის მოწოდებას. 1 საათიანი ლოდინის შემდეგ ბატონმა ნიკოლოზმა მობილური ტელეფონი გათიშა და დაცვის თანამშრომლის საშუალებით გადმოგვცა ინფორმაცია, რომ ჩვენი იქ ყოფნის შესახებ შპს "თბილისის მიკროავტობუსების" ხელმძღვანელებმა შეიტყვეს და იგი ცენტრალურ ოფისში დაიბარეს. ავტოპარკის დაცვის თანამშრომელმა არც ავტოსადგომში შესვლის უფლება მოგვცა.

Ambebi.ge შპს "თბილისის მიკროავტობუსის" ხელმძღვანელს, დავით ასანიძეს დაუკავშირდა, რომელმაც მძღოლებისთვის გეგმური გადასახადის გაძვირება დაადასტურა.

"როდესაც გეგმური გადასახადი დავუწესეთ მძღოლებს, ნაანგარიშევი გვქონდა, რომ საწვავში იხდიდნენ 2 ლარსა და 10 თეთრს, 30 ლიტრი გამრავლებული 2 ლარსა და 10 თეთრზე არის 63 ლარი. დღეს უკვე საწვავი, რომელიც ჩვენივე ბენზინგასამართ სადგურებზე, ავტოფარეხში 1 ლარი და 59 თეთრი ღირს, რომ გავამრავლოთ 30 ლიტრზე, 47 ლარი და 70 თეთრი, ამას რომ გამოვაკლოთ 63 ლარი, ვნახავთ, რომ მძღოლებს 15 ლარზე მეტი გამოსდით ეკონომია. ამ 15 ლარიდან, ვეუბნებით, რომ 12 ლარი სიკეთეში მოგახმაროთ ღმერთმა, თქვენი იყოს, მაგრამ 3 ლარი მოგვეცით, რომ კომპანიამ შეძლოს ბანკის წინაშე გაზრდილი ვალდებულებების შესრულება. რა არის ამაში ცუდი? და რა არის მიუღებელი? დოლარის კურსის ცვლილებით კომპანიას გაცილებით მეტი ზიანი მოგვადგა, ვიდრე ამ 3 ლარს შეუძლია დააკომპენსიროს", - აცხადებს ასანიძე. მისივე თქმით, კომპანიას 3 წლის განმავლობაში ბიუჯეტში 28 მილიონი ლარი აქვს შეტანილი.

რაც შეეხება მანქანების ხანდაზმულობას, "თბილისის მიკროავტობუსის" ხელმძღვანელი განმარტავს, რომ 2011-2012 წელს გამოშვებული მანქანებია.

"ყველა მძღოლს გათვალისწინებული აქვს, რომ დღიურად დარჩეს მანქანის მომსახურების თანხა. ეს შემოსავალი იანგარიშება ასე, - ყოველ გავლილ კილომეტრზე 7 თეთრი. ჩვენი მანქანები საშუალოდ დღეში 200 კილომეტრს გადიან, საშუალოდ, თითო მძღოლს დღეში 14 ლარი რჩება. თვეში მანქანის შესანახად მათ 420 ლარი რჩებათ. ჩვენ შევთავაზეთ მძღოლებს, რომ ეს თანხა შემოეტანათ კომპანიაში და კომპანია მოუვლიდა ამ მანქანებს, რაზეც უარი განაცხადეს, რადგან რეალურად, არათუ ყოფნით, არამედ რჩებათ კიდეც თანხები", - განაცხადა ასანიძემ.

რაც შეეხება შეკითხვას, საწვავის ფასის კლების გამო, მოხდება თუ არა სამგზავრო ტარიფების დაწევა, "თბილისის მიკროავტობუსის" ხელმძღვანელი განმარტავს, რომ ფასების კლება არ იგეგმება.

იხილეთ სიუჟეტი

თეა ბითაძე

AMBEBI.GE