თინა ხიდაშელი - "ნაციონალების" კრიტიკას ლეგიტიმაცია არ გააჩნია

დეპუტატ თინა ხიდაშელის შეფასებით, მოსახლეობის მთავარი კითხვა და საყვედური, რაც მმართველი გუნდის წევრების მიმართ აქვს, არის ის, თუ რატომ არიან "ნაციონალური მოძრაობის" გვერდით პარლამენტში. აღნიშნული განცხადება ხიდაშელმა ორი კომიტეტის გაერთიანებულ სხდომაზე კოლეგის, გიორგი მელაძის მისამართით გააკეთა, რომელმაც ხელისუფლების წარმომადგენლებს, მასთან ერთად ბაზრობებზე წასვლა და მოსახლეობის პრობლემების გაცნობა შესთავაზა.

"ბატონებო, იცით რას მეუბნებიან ბაზრობებზე ადამიანები?! აღარ გვიყვარხართ იმის გამო, რომ პარლამენტში "ნაციონალური მოძრაობის" გვერდით სხედხართო. აი, ამას გვეუბნებიან ძირითადად. ეს არის მათი პირველი წინადადება და ამის შემდეგ სვამენ სხვა კითხვებს. ასე რომ, თქვენთან ერთად ბაზრობებზე წამოსვლის სურვილი არასდროს მექნება", - მიმართა გიორგი მელაძეს თინა ხიდაშელმა.

ამასთან, დეპუტატმა სამწუხარო უწოდა მისი ოპოზიციონერი კოლეგების განცხადებებს იმის შესახებ, თითქოს ეკონომიკის მინისტრისგან დღეს მხოლოდ სანიტარული საშუალებების ხარჯების შემცირების გეგმა მოისმინეს.

ხიდაშელის თქმით, მათი ამგვარი დამოკიდებულება ცხადყოფს, რომ მათ კრიტიკას ლეგიტიმაცია არ გააჩნია. თინა ხიდაშელმა "ნაციონალური მოძრაობის" წევრების მხრიდან გაკეთეულ შეფასებებს არაადეკვატური უწოდა.

"ინტერპრესნიუსი"