ნინო გვენეტაძეს ხვალ ფრაქცია "ქართულ ოცნებაში" მოუსმენენ

უზენაესი სასამართლოს თავმჯდომარეობის კანდიდატს, ნინო გვენეტაძეს ხვალ ფრაქცია "ქართულ ოცნებაში" მოუსმენენ. ფრაქციის სხდომა, 17:00 საათზე, პარლამენტშია დაგეგმილი.

არსებული ინფორმაციით, გვენეტაძის კანდიდატურასთან დაკავშირებით ფრაქცია "ქართულ ოცნებაში", რომელიც ყველაზე დიდია უმრავლესობის ფარგლებში, ერთსულოვანი განწყობა არ არსებობს და ფრაქცია ერთიან პოზიციაზე არ დგას. ძირითადად საუბარია დეპუტატებზე, რომლებმაც უზენაესი სასამართლოს თავმჯდომარეობის კანდიდატურის შერჩევის საკითხთან და კრიტერიუმებთან დაკავშირებით ღია განცხადება გამოაქვეყნეს. ამასთან, ფრაქციის წევრმა ზაქარია ქუცნაშვილმა კითხვებით მიმართა გვენეტაძეს, რომელიც მის სამოსამართლეო საქმიანობას ეხება.

ნინო გვენეტაძის კანდიდატურასთან დაკავშირებით ფრაქცია "ქართულმა ოცნებამ" დაახლოებიოთ ორი კვირის წინ დახურულ ფორმატში იმსჯელა, ხვალ კი მას პირადად შეხვდებიან.

უმრავლესობა უზენაესი სასამართლოს თავმჯდომარეობის კანდიდატის არჩევის საკითხის პლენარულ სხდომაზე გატანას მომავალ კვირას - 18-20 მარტის სესიის ფარგლებში აპირებს.

"ინტერპრესნიუსი"