პალიასტომის ტბამ მკვდარი, დაავადებული თევზები გამორიყა

ფოთში პალიასტომის ტბაზე, მდინარე კაპარჭინისა და შავღელის არხში მკვდარი თევზების გამორიყვის ფაქტები დაფიქსირდა. როგორც "ინტერპრესნიუსის" კორესპონდენტი იუწყება, თევზებს წითელი ლაქები აღენიშნებათ.

კოლხეთის ეროვნული პარკის რეინჯერებმა მკვდარი თევზები პატრულირებისას ნახეს. პარკმა აჭარის რეგიონის ასოციაცია "ფლორასა და ფაუნას" წარმომადგენელს არჩილ გუჩმანიძეს მიმართა. დადგინდა, რომ გამორიყულ თევზებს დაავადება წითურა აღმოაჩნდათ, რაც, სპეციალისტების ინფორმაციით, პალიასტომის ტბის წყლის დონის მკვეთრ დაწევასთან არის დაკავშირებული. კოლხეთის ეროვნული პარკის ინფორმაციით, ნალექის მოსვლისთანავე სიტუაცია განიმუხტება.