მებაჟე ოფიცრებმა არადეკლარირებული ძვირფასი ლითონები აღმოაჩინეს

მებაჟე ოფიცრებმა წითელ ხიდზე არადეკლარირებული ძვირფასი ლითონები აღმოაჩინეს. როგორც "ინტერპრესნიუსს" შემოსავლების სამსახურიდან აცნობეს, 15 მაისს საბაჟო გამშვებ პუნქტის, "წითელი ხიდის" ტერიტორიაზე აზერბაიჯანის მოქალაქეს, კ.კ-ს საბაჟო შემოწმებისას აღმოაჩნდა ოქროს არადეკლარირებული ნაკეთობები: ოქროს ყელსაბამები (2ც), სამაჯურები (2ც), საათი, ბეჭედები (2ც), ე.წ. სამეული (საყურე და ბეჭედი), ყელსაბამი კულონით, ოქროს საყურე, ბავშვის საწოვარას ოქროს ნაწილი, ოქროს ჯართი, საერთო წონით 180,23 გრამი. აღნიშნული საქონლის საბაჟო ღირებულებამ 8248,15 ლარი შეადგინა.

შემოსავლების სამსახურის ინფორმაციით, საქართველოს საგადასახადო კოდექსის 289-ე მუხლის მე-10 ნაწილის თანახმად, აზერბაიჯანის მოქალაქეს სანქციის სახით შეეფარდა ფულადი ჯარიმა 8248,15 ლარის ოდენობით.

მათივე ცნობით, ამავე დღეს, წითელ ხიდზე არადეკლარირებული ოქროს ნაკეთობების ქვეყანაში შემოტანის მცდელობის კიდევ ერთი ფაქტი გამოვლინდა. კერძოდ, საქართველოს მოქალაქეს, ა.ე-ს აღმოაჩნდა 4950.52 ლარის ღირებულების საქონელი, მათ შორის, ოქროს ყელსაბამები (3ც), საყურე, ბეჭედი ბრილიანტით.

საქართველოს საგადასახადო კოდექსის 289-ე მუხლის მე-10 ნაწილის შესაბამისად, საქართველოს მოქალაქეს სანქციის სახით შეეფარდა ფულადი ჯარიმა 4950,52 ლარის ოდენობით.

"ინტერპრესნიუსი"