კორტების სპეცოპერაციის საქმეზე დაკავებულ რიგით სპეცრაზმელებს შესაძლოა, ბრალი შეუმსუბუქდეთ

ადვოკატი მიიჩნევს, რომ ე.წ. კორტების სპეცოპერაციის საქმეზე რიგითი სპეცრაზმელების საქმე ხელძღვანელი პირების საქმიდან იმ მოტივით გამოიყო, რომ პროკურატურას მათთვის ბრალის შემსუბუქება უნდა, - ამის შესახებ სპეცრაზმელების ალექსანდრე სანიკიძისა და დავით ალელიშვილის ადვოკატმა, დავით დადიანმა "ინტერპრესნიუსს" განუცხადა. მისი თქმით, პროკურატურის განცხადება, რომ საქმის გაყოფის მიზეზი რიგითი სპეცრაზმელების ოფიციალური მიმართვებია, სიმართლეს არ შეესაბამება.

"ჩვენ მიგვაჩნია, რომ საქმეში არის ბევრი ისეთი მტკიცებულება, რომლის გამოკვლევა არ უნდა მოხდეს განხილვებზე, მაგრამ ბრალდებულებს პროკურატურისთვის განცხადებებით არ მიუმართავთ. ეს ადამიანები უდანაშაულოდ არიან დაკავებული და ვფიქრობ, რომ საქმის გამოყოფით პროკურატურას სურს, მათ ბრალი შეუმსუბუქოს", - განაცხადა ადვოკატმა.

საქმის პროკურორის ამირან გულუაშვილის განცხადებით, ე.წ კორტების სპეცოპერაციის საქმეზე 12 პირის ბრალდების საქმე იმ მოტივით გაიყო, რომ ბრალდებულების ნაწილი პროკურატურის მტკიცებულებების დიდ ნაწილს უდავოდ სცნობს.

პროკურორის ინფორმაციით, იმ ბრალდებულებმა, ვისაც ეს პოზიცია აქვთ, ბრალდების მხარეს მიმართეს განცხადებებით, სადაც ისინი აღნიშნავენ, რომ არ ხდიან სადავოდ მტკიცებულებების დიდ ნაწილს. ეს კი, გულუაშვილის თქმით, ნიშნავს იმას, რომ საქმის განხილვას ნაკლები დრო დასჭირდება, შესაბამისად, მისი თქმით, იმ ბრალდებილების საქმე, ვისაც ერთნაირი პოზიცია აქვს უდავოდ ცნობასთან დაკავშირებით, ცალკე წარმოებად გამოიყო. ამასთან, კორტების სპეცოპერაციის საქმეზე, რიგითი სპეცრაზმელების წინასასამართლო სხდომა დილიდან მიმდინარეობს. სპეცოპერაციის ხელმძღვანელი პირების - ირაკლო ფირცხალავას, კახა ნაკანის და სხვათა საქმეზე კი სხდომა 5 ივნისს გაგრძელდება.

"ინტერპრესნიუსი"