"ვიღაცას მოვწონვარ და ვიღაცას ვეზიზღები" - გიორგი გაბუნია კადრს მიღმა და ჟურნალისტის ორმაგი პროფესიული ცხოვრება

ჩვენი რესპონდენტი, ჟურნალისტი გიორგი გაბუნია პრესისთვის იშვიათი სტუმარია. არ უყვარს ინტერვიუს მიცემა, არადა, იმის გარდა, რომ პოლიტიკური გადაცემების წამყვანია, "X ფაქტორის" ყველაზე ცხარე შემფასებელი გახლავთ, რადგანაც ყველაფერს შელამაზების გარეშე ამბობს. კონკურსანტებიც ყველაზე მეტად მას უფრთხიან. მოკლედ, მის მიმართ უამრავი კითხვა ჩნდება. მოკლედ, როგორღაც ისე მოხდა, რომ გიორგი გაბუნია Ambebi.ge-ს ექსკლუზიურად გაესაუბრა.

- მუშაობ სერიოზულ პოლიტიკურ თემებზე და ამასთან, "X ფატორი"... მაგრამ მგონია, რომ ყველგან, სადაც უნდა გამოჩნდე, ერთი და იგივე გიორგი გაბუნია ხარ...

- მეც ასე ვფიქრობ და მაყურებელიც შეეჩვია იმას, რომ არც ერთ ამპლუაში როგორც უცხო სხეულს, ისე არ აღმიქვამს. ერთმანეთისგან ძალიან განსხვავებული სფეროებია და ამ ყველაფერზე პარალელურ რეჟიმში ვმუშაობ, ანუ ჩემ დღევანდელ საქმიანობას ორი განსხვავებული მიმართულება აქვს - "X ფაქტორი" და პოლიტიკური გადაცემები - "არჩევანი" და "შაბათის კურიერი". თან, ისე არ არის, რომ ერთ დღეს ერთზე ვმუშაობ და მეორე დღეს - მეორეზე, ხომ ვამბობ, ერთდროულად ვარ ყველგან. მაგალითად, ბოლოს, შაბათის "კურიერზე" რომ ვიმუშავე, შუალედში რეპეტიციაზე კონკურსანტებთან გადავრბოდი, ვნახულობდი, ვუსმენდი. მერე გამოვრბოდი, რამდენიმე წუთის განმავლობაში ვწერდი და ვამზადებდი სიუჟეტს იმის შესახებ, რა ხდება პოლიტიკურ სივრცეში, ეკონომიკაში, რომ გადაცემაში ამ თემებზე მესაუბრა. მოკლედ, მიუხედავად იმისა, რომ მაყურებელი ამ ყველაფერს ცალ-ცალკე ხედავს, მე მათზე პარალელურად ვმუშაობ.

- ეს ყველაფერი რაღაც ცივი და ცხელი შხაპის მონაცვლეობას ჰგავს...

- კი (იცინის), ნამდვილად ასეა. ცოტა რთულია ერთი საქმიდან მეორეზე გადართვა, მაგრამ რაღაც გამოვიმუშავე, უფრო სწორად, იძულებული ვარ გამოვიმუშავო, სხვანაირად არ გამომდის, რადგანაც ერთიდან მეორეზე გადართვა ხშირად მიწევს.

- მერე ცივი და ცხელი შხაპი ჯანმრთელობისთვის სასარგებლოა...

- კი, გულსა და სისხლძარღვებს ამაგრებს. ასე რომ, მუსიკალური "სისხლძარღვები" და "პულსი" ძალიან ჯანმრთელი მაქვს...

- პროფესიით ვიცი, რომ არქიტექტორი ხარ. მუსიკალური განათლება თუ გაქვს?

- დიახ, პროფესიით არქიტექტორი ვარ. ბავშვობაში მუსიკალურ სკოლაში დავდიოდი და შვიდწლედი ფორტეპიანოს განხრით დავამთავრე, გავდიოდი სოლფეჯიოსაც, მაგრამ ეს ცოტა სხვა მიმართულების განათლებაა. იმ განხრით, რაც დღეს თანამედროვე მუსიკას სჭირდება, არ მისწავლია...

- შოუში მენტორი ხარ და ადამიანების შემფასებელიც, რომლებიც ამ საქმეში პირველ ნაბიჯებს დგამენ. ერთგვარი შიშის მომენტი ხომ არ გაქვს, - რაიმე არ გამოგრჩეს, ან რაღაც არ გამოგეპაროს?

- მიუხედავად იმისა, რომ ჩემი კოლეგები, როგორც კი ისეთ რაღაცას ვიტყვი, რაც მათ არ მოეწონებათ, მაშინვე მახსენებენ, რომ მუსიკალური განათლება არ მაქვს, თავად კი მუსიკოსები არიან. ამით ჰგონიათ, რომ "მაზოლზე" ფეხს მაჭერენ, არადა, ამაზე რეაქცია ნამდვილად არ მაქვს. სულ ხაზს ვუსვამ იმას, რომ "X ფაქტორი" არ არის გამოცდა კონსერვატორიაში, სადაც მუსიკოსებმა კონკურსანტები ტექნიკურად უნდა შეაფასონ, - ვინ როგორ მღერის. ჟიურიში მე იმ ჩვეულებრივი მაყურებლის კატეგორიას წარმოვადგენ, რომელიც გადაწყვეტილებას იმის მიხედვით იღებს, მოსწონს თუ არა კონკურსანტი და მაინცდამაინც პროფესიული დეტალები არც აინტერესებს. ვთქვათ, ვიღაცამ ესა თუ ის ნოტი ზუსტად აიღო თუ არა.

- მოკლედ, ჟიურიში იმ მაყურებლის კატეგორიას წარმოადგენ, რომელსაც მუსიკალური განათლება არ სჭირდება...

- არა, მე როგორც რიგითი მსმენელი, ისე ვიღებ გადაწყვეტილებას და არა მუსიკალური ჟიური.

- ცოტა ხის წინ ერთ კონკურსანტს ვკითხე, რომელი ჟიურის წევრის გეშინია-მეთქი. შიში არ ვიცი და გიორგი გაბუნიას შეფასება ჩემთვის მნიშვნელოვანიაო. როგორ ფიქრობ, ბევრს ეშინია შენი?

- ამას ალბათ შიში არ ჰქვია, მაგრამ კონკურსანტებს ხშირად შელამაზების გარეშე, ანუ რაც არ მომწონს, სათქმელს ვეუბნები. თუმცა როცა ჟიურის წევრი ცოტას უხეშობს, მაყურებელზე მოქმედებს და ეს კონკურსანტებმა კარგად იციან, შეიძლება სწორედ ამიტომაც უფრთხიან ჩემს შეფასებას. ასე რომ, შეიძლება ხშირად გამოვხატო ჩემი აზრი და ვთქვა იმის შესახებ, რაც არ მომწონს, რაც მაყურებელზე საბოლოოდ გავლენას იქონიებს.

- ეს ხომ შენს რეიტინგზეც უარყოფითად მოქმედებს...

- არა, პირიქით, რეიტინგი დადებითია თუ უარყოფითი, მაინც რეიტინგია. არის მაყურებლის ნაწილი, რომელიც ჩემს ამ ქმედებას დადებითად შეაფასებს და ნაწილი - უარყოფითად. მთავარია, რომ ორივე მხარე გიყურებს. ეს მედლის ორი განსხვავებულ მხარეა და რეიტინგს ორივე წერს. ხშირად რომ ლაპარაკობ გაუთავებლად და ცდილობ, არც მწვადი დაწვა და არც - შამფური, უინტერესო ხდები. მაყურებელიც საერთოდ არანაირად არ გაფასებს და სწორედ ესაა ურეიტინგობა. ჩემი შემთხვევა ორად არის გაყოფილი. ვიღაცას მოვწონვარ და ვიღაცას ვეზიზღები. მოკლედ, რეიტინგის ორი მხარე, ორი შემადგენელი ნაწილია.

- თუ ვინმეს ეზიზღები, ეს არ გაღელვებს და მაინც შენს პოზიციაზე რჩები?

- დიახ, არ მანაღვლებს და ის, რასაც არა მარტო "X ფატორში", არამედ პოლიტიკურ გადაცემებშიც ვლაპარაკობ, არასდროს არის გამოგონილი. მე არ მაქვს ხელოვნურად შექმნილი იმიჯი. ძალიან ბუნებრივი ვარ და ამას მაყურებელი შეატყობდა. "X ფაქტორშიც", როდესაც კონკურსანტებს ვაფასებ, კონკრეტულად ამა თუ იმ ადამიანისთვის მორგებულ შეფასებებს ვამბობ და არასდროს მაქვს ზოგადი და განუსაზღვრელი კომენტარები, რომელიც ნებისმიერს მოერგება. ყოველთვის იმას ვამბობ, რასაც ვფიქრობ. მერე უკვე მაყურებლის გადასაწყვეტია, მოეწონება თუ არა ეს.

- ვფიქრობ, რომ ისეთივე ხარ პოლიტიკურ გადაცემებშიც, როგორც "X ფაქტორში"...

- რა თქმა უნდა, თუმცა "X ფაქტორში" მეტი თავისუფლება მაქვს. პოლიტიკაში შეიძლება რაღაცას ვფიქრობდე, მაგრამ როგორც ჟურნალისტს, "არჩევანში" არ მაქვს უფლება, ყველაფერი ვთქვა...

- არა მგონია, რომ ასე იყოს, - საკუთარ აზრს ყოველთვის აფიქსირებ...

- "შაბათის კურიერი" სწორედ ამიტომ არის განსხვავებული, რომ საკუთარ მოსაზრებას არ ვზღუდავ და ჩემი ფრაზეოლოგიის გამო ის გამორჩეულია. არ ვერიდები ჩემი აზრის გამოხატვას. ხშირად როგორც ჟურნალისტურ, ისე ადამიანურ პოზიციას ვაფიქსირებ, რადგანაც საავტორო "კურიერია" და ამის უფლება მომცეს. თან, არ მინდა, ვიყო ნეიტრალური ჟურნალისტი, რომელიც მაყურებელს მხოლოდ ინფორმაციას აწვდის და თავისი არანაირი დამოკიდებულება არ აქვს იმ ინფორმაციისადმი.

- ზოგადად ცხოვრებაში თუ ხარ მენტორი, პედაგოგი, მასწავლებელი?

- ცხოვრებაში ამისკენ მაინცდამაინც არ ვარ მიდრეკილი. მიუხედავად იმისა, რომ ბავშვობიდან მიწევდა უნივერსიტეტში რაღაც საგნების მეგობრებისთვის და თანაკურსელებისთვის ახსნა, მაქვს მასწავლებლად მუშაობის გამოცდილებაც, საკვირაო სკოლაში ვმუშაობდი და მეუბნებოდნენ, რომ კარგი გადმოცემისა და ახსნის უნარი მაქვს. ამიტომ "კურიერშიც" როცა რაღაცის გრაფიკებით ახსნის საშუალება მაქვს ხოლმე, ვგიჟდები, ისე მომწონს ამის გაკეთება. რეალურ ცხოვრებაში კი ასეთი მიდრეკილება არ მაქვს და ვერიდები, რომ მუდმივად ვიღაცას ჭკუა ვასწავლო. ადამიანს ჩემი დამოკიდებულება შეიძლება ვუთხრა, მაგრამ აზრს არავის ვახვევ. თუმცა მეუბნებიან, რომ ახსნა და რთული საგნის მარტივად მიწოდება ადვილად გამომდის...

- ჟიურის წევრებს შორის ხშირად არის ხოლმე შეკამათება, განსაკუთრებით შენ და ანრი ჯოხაძე ვერ რიგდებით. ამბობენ, რომ ეს დადგმულია და შოუს ელემენტია.

- დადგმული არაფერია, ასეთი მომენტები შოუში მუდმივად და ბუნებრივად ჩნდება. რეალურად ჩვენ შორის არანაირი პაექრობა არ არის გაჩაღებული, მით უმეტეს, შუღლი. ხომ ვამბობ, რაღაცები ბუნებრივად ხდება. მაგალითად, ბოლო კონცერტზე რომ დავინახე ანრის წინ ნავი, როგორ გავძლებდი ისე, რომ რაიმე არ მეთქვა: დროზე გაიტანეთ ნავი, ანრი არ გაშიშვლდეს და შიგ არ ჩაგორდეს-მეთქი. ასეთი რაღაცები უკვე იქ სპონტანურად ხდება და ორივე მხრიდან ხუმრობას აქვს ხოლმე ადგილი. ჟიურის წევრებს ერთმანეთთან კარგი დამოკიდებულება გვაქვს. თუმცა შოუში ის მომენტი ჩადებულია, რომ ერთმანეთს ვეჯიბრებით და გვინდა, რომ ჩვენი კონკურსანტები შორს წავიდნენ. როდესაც მათ მიმართ კრიტიკულ შენიშვნებს გამოვთქვამ, ხშირად ამას ისე აღიქვამენ, რომ თითქოს ვცდილობ, ისინი ამ გზით დავძირო. ასე რომ ვმოქმედებდე, მაშინ მათ ყველა კონკურსანტს გავაკრიტიკებდი. ყველას არ ვაკრიტიკებ, მაგრამ არიან ადამიანები, რომლების მიმართაც მკაცრი ვარ.

რაც შეეხება ჩემი კატეგორიის კონკურსანტების მიმართ ჩემ დამოკიდებულებას, მაყურებელი მათი მისამართით გამოთქმულ შენიშვნებს ვერ მოისმენს, რადგანაც ყველა შენიშვნას სარეპეტიციო დარბაზში ვაძლევ. მენტორის ვალდებულებაა, რაც შეიძლება დადებითად წარმოვაჩინო ისინი.

- ხაზი არ გაუსვა მათ ხარვეზებს, ეს არაობიექტურობა არ არის?

- არა, ეს ჩემი ვალდებულებაა... მე მათი მენტორი ვარ.

- ამ შოუს მაგალითზე შეიძლება თუ არა მოიძებნოს მსგავსება, დღევანდელ პოლიტიკურ სიტუაციასა და შოუბიზნესს შორის?

- როგორ არა. ყველა კარგად ხედავს დღეს მთავარი ვარსკვლავები, შოუმენები რომ პოლიტიკოსები არიან. ხოლო ის მუსიკოსები, რომლებთანაც მხოლოდ რამდენიმე თვის განმავლობაში მაქვს ხოლმე ურთიერთობა, სამწუხაროდ, მათი ძირითადი ნაწილი შოუს შემდეგ იკარგება, რაც ამ ადამიანების ბრალი არ არის. ასეთი რამ დალაგებულ და მოწესრიგებულ ქვეყანაში არ ხდება, მაგრამ არ არსებობს ბაზა, სადაც ისინი უნდა განვითარდნენ. ამაზე გული ძალიან მწყდება. არადა, ისინი თავიანთი მონაცემებით ვარსკვლავები უნდა იყვნენ და არა ვთქვათ, გამგებლები, მინისტრები, მათი მოადგილეები, პროკურორები, რომელთა სახელებიც მუდმივად გვესმის ნებისმიერი ხასიათის პოლიტიკურ თუ გასართობ თოქ-შოუში. ასეთი ნიჭიერი ადამიანები კი ერთხელ გამოჩნდებიან და მერე მინიმალურად გვესმის მათზე რაღაც ინფორმაცია.

- რატომ?

- იმიტომ, რომ ქვეყანაში ეკონომიკური პრობლემებია, იმას ვერ მივაღწიეთ, რომ ადამიანებს არ შიოდეთ. ეს საკითხები მათ პოლიტიკოსებმა უნდა მოუგვარონ... პოლიტიკოსებისადმი კი მასმედიის ასეთი ყურადღება მახინჯ ფორმას იღებს, - ისინი ამასობაში ვარსკვლავები ხდებიან. ვარსკვლავობა კი არა, საქმე უნდა აკეთონ.

- "X ფაქტორი" როგორ დამთავრდება? რა მოლოდინი გაქვს?

- მოდი, ჩემს კატეგორიაზე გეტყვით: შარშან ბიჭები მყავდა და წელს მეგონა, რომ ბიჭები აღარ იქნებოდნენ, მაგრამ სუპერკმაყოფილი ვარ, რადგანაც ძალიან ძლიერი კონკურსანტები მყავს. განსხვავებულები და ერთმანეთზე უკეთესები. ბიჭების კატეგორიას უდიდესი შანსი აქვს ფინალამდე მივიდეს და შემდეგ უკვე გაიმარჯვოს. ეს იმის ბარალია, რომ ძალიან ნიჭიერები არიან. არაჩვეულებრივი ადამიანები და პიროვნებები არიან, დადებითები. მიხარია მათთან ურთიერთობა, მიყვარს ისინი და ყოველი წუთი მათთან გატარებული, ჩემთვის ძვირფასია და ყველაფერს ვიზამ, რომ ფინალამდე მივიდეთ და მერე კი გამარჯვებამდე.

ლალი ფაცია

AMBEBI.GE