დაირღვა თუ არა ბავშვთა უფლებები მარიხუანას დეკრიმინალიზაციის მოთხოვნით გამართულ აქციაზე? - უფლებადამცველისა და აქციის ორგანიზატორის შეფასებები

გუშინ, 2 ივნისს, კანცელარიასთან შეკრებილმა საზოგადოებამ მარიხუანას დეკრიმინალიზაცია მოითხოვა. აქციაზე, სახელწოდებით "არ დაიჭირო", პატარა ბავშვებიც მიიყვანეს, რასაც საზოგადოების ერთი ნაწილის აღშფოთება მოჰყვა.

Ambebi.ge კომენტარისთვის ბავშვთა უფლებების დამცველს, გიორგი თევზაძეს დაუკავშირდა:

- მსოფლიოს არცერთ ქვეყანაში არ მომხდარა ასეთი ფაქტი, როცა პატარა ბავშვი გაიყვანეს მსგავსი ტიპის აქციაზე. უარყოფითად ვაფასებ ამ ფაქტს, მათთან პოპულარიზაცია არ სჭირდება მარიხუანას, ისინი ჯანსაღი გზით უნდა აღვზარდოთ. თუ ვინმეს მოსწონს მარიხუანა, ეს მისი პრობლემაა და ბავშვები ამაში არ უნდა გარიო. მათ დაარღვიეს ბავშვების უფლება. მშობელმა არ უნდა წაიყვანოს პატარა ასეთ აქციაზე. ბავშვის ფსიქიკას უნდა გაუფრთხილდეს. მიმაჩნია, რომ არ არის სწორი ასეთი საქციელი. მარიხუანას ლეგალიზება დაუშვებელია, ის მძიმე შედეგებს გამოიწვევს საზოგადოებაში, შევა სკოლებში. თუმცა ნულოვანი ტოლერანტობის მომხრეც არ ვარ.

Ambebi.ge ამავე თემაზე აქციის ორგანიზატორის, ლექსო მაჭავარიანის მოსაზრებითაც დაინტერესდა.

- დაირღვა თუ არა პატარების უფლებები მათი მარიხუანას დეკრიმინალიზაციის მოთხოვნით გამართულ საპროტესტო აქციაზე მიყვანით?

- დღეს არის ლომისობა, სადაც ბევრი ბავშვი დაყავთ და სადაც ცხოველებს ხოცავენ. ირღვევა თუ არა იქ ბავშვების უფლებები?! გუშინ იყო მშვიდობიანი აქცია, სადაც ადამიანები მოითხოვდნენ, რომ არ დაიჭირონ სხვა ადამიანები. რატომ უნდა დაირღვეს აქ ბავშვის უფლებები? დეკრიმინალიზაცია ნიშნავს, რომ არ დაიჭირონ ადამიანი. სამი წელია ტარდება ეს აქცია, სადაც ხალხი ოჯახით მოდის, ცოლებით, ქმრებით, ბებიებით, ბავშვებით და ა.შ. პოლიტიკურ აქციებზე დაჰყავთ ბავშვები. ამ ხალხის პოზიციაც მესმის, ყველას აქვს საკუთარი აზრის გამოთქმის უფლება, მაგრამ არ ვეთანხმები მათ, ვინც ამბობს, რომ ბავშვის უფლებები დაირღვა.

თამარ ბოჭორიშვილი

AMBEBI.GE