"ერთი საათის განმავლობაში მოდიოდა სეტყვა, შიმშილით დავიხოცებით" - სტიქიამ გრემისხევი გაანადგურა

დუშეთის რაიონის სოფელ გრემისხევის მოსახლეობა დახმარებას ითხოვს. წუხანდელი წვიმისა და სეტყვის შედეგად თითქმის მთლიანად განადგურდა მოსავალი. ადიდებულმა მდინარემ მოსახლეობის შინაური ცხოველები და ფრინველები წაიღო.

წვიმის შედეგად რამდენიმე მოსახლის საცხოვრებელი სახლი დაიტბორა.

"ერთი საათის განმავლობაში მოდიოდა სეტყვა. მსგავსი რამ ბოლო წლების განმავლობაში არ გვახსოვს. მოსავლის გარეშე დავრჩით და თუ რაიონის ხელმძღვანელობა არ მოგვხედავს, შიმშილით დავიხოცებით", - განუცხადეს "ინტერპრესნიუსს" გრემისხევის მცხოვრებლებმა.

გარდა გრემისხევისა, გუშინ სტიქიამ დუშეთის მუნიციპალიტეტის სხვა სოფლებიც დააზარალა.

"ინტერპრესნიუსი"

იხილეთ გალერეა