"დაგვღუპა ექიმმა" - ბათუმის სამშობიაროში ჩვილის გარდაცვალებაში ექიმს ადანაშაულებენ

ბათუმის სამშობიარო სახლში ჩვილის გარდაცვალებაში ექიმს ადანაშაულებენ. 32 წლის ქალი საავადმყოფოში 4 დღის წინ მიიყვანეს, თუმცა იგი სტაციონარში არ მოათავსეს. დაზარალებული ქალბატონის ოჯახის წევრების განცხადებით, ექიმმა მათ საკეისრო კვეთაზე უარი უთხრა და ორშაბათამდე მოცდა ურჩია. დღეს კი მედიკოსებმა დაადგინეს, რომ ჩვილი მუცლადყოფნის პერიოდში, რამდენიმე დღის წინ გარდაიცვალა.

ოჯახის წევრები ექიმის პასუხისმგებლობის საკითხს აყენებენ. "ეს გოგო მე ობლად გავზარდე და მის გამწარებას არავის ვაპატიებ. წინასწარ ავიყვანეთ ექიმი - ნუკრი ბეჟანიძე. პაციენტი შემოვიდა ხუთშაბათს და გადაუღეს ექოსკოპია. გამოკვლევის თანახმად, ბავშვი მჯდომარე მდგომარეობაში იყო. ექიმმა უთხრა, წაბრძანდი სახლში და სამი დღის შემდეგ მობრძანდი. ან ბავშვი შემობრუნდება და დაიწყება მშობიარობა, ან ჩავატარებთ საკეისრო კვეთას. დაგვღუპა ექიმმა", - აცხადებს მშობიარე ქალის ბიძა თემურ გოგიტიძე.

"ინტერპრესნიუსი"