პარტნიორები:

ზურაბ ადეიშვილი 7 ნოემბერზე, ციხის კადრებზე, ივანიშვილზე, ჟვანიასა და გირგვლიანის საქმეებზე

14:53 / 09-06-2015

2007 წლის 7 ნოემბერს რიგ შემთხვევებში ძალის გადაჭარბებას ჰქონდა ადგილი, - ამის შესახებ ტელეკომპანია "რუსთავი 2"-თან ექსკუზიურ ინტერვიუში, მაშინდელმა იუსტიციის მინისტრმა ზურაბ ადეიშვილმა განაცხადა.

მისი თქმით, ამ დარღვევებზე "მაშინაც და შემდეგაც" იყო რეაგირებები. "მიტინგის დაშლისას არალეგიტიმურობას ადგილი ცალსახად არ ჰქონია, რადგან ამის საფუძველი ნამდვილად იყო, იქიდან გამომდინარე, რომ საფრთხე ემუქრებოდა დემოკრატიულ ინსტიტუტებს. ამ დროს სახელმწიფო პირიქით, ვალდებულია იმოქმედოს. რაც შეეხება ძალის გადაჭარბებულ გამოყენებას, რიგ შემთხვევაში იყო და ამ რიგ შემთხვევებთან დაკავშირებით მაშინაც და შემდეგაც იყო რეაგირებები", - განაცხადა ადეიშვილმა.

მისივე თქმით, ნოემბრის აქციებზე ოლიგარქი ხელისუფლების გადაფორმებას ცდილობდა და სახელმწიფო ვალდებული იყო გადამწყვეტი ნაბიჯები გადაედგა. "საზოგადოებას ამასთან დაკავშირებით ინფორმაცია აქვს. ამ პერიოდის განმავლობაში მიდიოდა ერთი სერიოზული პროცესი, რასაც ჰქვია ოლიგარქის მიერ ხელისუფლების გადაფორმება და აქედან გამომდინარე სახელმწიფო ვალდებული იყო გადამწყვეტი ნაბიჯები გადაედგა. მით უმეტეს მაშინ, როდესაც კონსტიტუციურ წყობილებას როდესაც ემუქრება საფრთხე, სახელმწიფო ვალდებულია მიიღოს ზომები და გაატაროს ყველა ის ნაბიჯი რაც აუცილებელია დემოკრატიული წყობილების შესანარჩუნებლად", - აღნიშნა ადეიშვილმა.

მისივე თქმით, ტელეკომპანია "იმედში" შესვლის ლეგიტიმურობა ასევე იყო, თუმცა გარკვეული შეცდომები ამ შემთხვევაშიც იქნა დაშვებული. "ლეგიტიმურობის საკითხი არც ტელეკომპანია "იმედში" შესვლისას არ მდგარა, მაგრამ იმის გამო, რომ ჩვენთვის, ახალი სახელმწიფოსთვის, დემოკრატიული სახელმწიფოსთვის, ძნელი იყო ასეთი ტიპის გამოწვევებისთვის გამკლავება, მით უმეტეს როდესაც იყო ძალიან დიდი პოლარიზაცია და საქმე ეხებოდა ასეთი სიტუაციების მართვის გამოცდილების არ ქონას, გარკვეულ ექსცესებს ჰქონდა ადგილი. ძალის გადაჭარბებას ადგილი ნამდვილად ჰქონდა. ამასთან დაკავშირებით ის ზიანი, რომელიც მიადგა ტელეკომპანია "იმედს", ანაზღაურდა სახელმწიფოსგან. გარკვეული ღონისძიებები მაშინაც იქნა გატარებული. ცალსახად შეიძლება ითქვას, რომ იმ დროს გარკვეული შეცდომები დაშვებული იქნა", - განაცხადა ადეიშვილმა.

იუსტიციის ყოფილმა მინისტრმა ციხის კადრების შესახებაც ისაუბრა. მისი თქმით, ციხის კადრები იყო ძალიან მძიმე, მათ შორის მაშინდელი მთავრობის წევრებისთვისაც. "ციხის კადრები იყო მძიმე, მათ შორის ჩვენთვისაც. ამ კადრებმა დაადასტურა, რომ ციხეში იყო სერიოზული პრობლემები. ეს პრობლემები იყო სისტემური. ამ სისტემურ პრობლემებთან დაკავშირებით მე არ გავაკეთებ კომენტარს, რომ შეიძლება ამ კადრების ნაწილი ყოფილიყო დადგმული. თავისთავად ის ფაქტი, რომ ამ კადრების დადგმა იყო შესაძლებელი, ადასტურებს, რომ იყო სერიოზული პრობლემა და ასეთი რამის გაკეთება დაუსჯელად, მით უმეტეს ამ მასშტაბებით, იყო ძალიან ცუდი", - განაცხადა ადეიშვილმა.

მისი თქმით, ასეთი ფაქტები ყველა დახურულ სისტემას ახასიათებს. "ევროპაში და ამერიკაში ამ ფაქტებთან დაკავშირებით მიიღეს სერიოზული გადაწყვეტილებები, როდესაც მათ დანერგეს საზოგადოებრივი ზემოქმედების მექანიზმები. გამჭვირვალობა შემოიტანეს ციხეში, ამიტომ ჩვენი მთავარი შეცდომა იყო ის, რომ ასეთი ეფექტური მექანიზმები საქართველოში ვერ შეიქმნა და სწორედ ამიტომ მოხდა ასეთი სისტემური პრობლემა ციხეებში", - აღნიშნა ზურაბ ადეიშვილმა.

მისი თქმით, მის წინააღმდეგ საქართვეოში აღძრული საქმე ფაბრიკაციაა. "თუ რამეს შეიძლება დაერქვას ფაბრიკაცია, ეს შეიძლება დაერქვას იმ საქმეს, რომელიც ჩემს წინააღმდეგ არის აღძრული. ციხის კადრებთან დაკავშირებით, დავიწყეთ გამოძიება, 17 ადამიანი იქნა დაკავებული, მაგრამ რა მოხდა შემდეგ - შემდეგ ამ 17 ადამიანიდან ნაწილი იქნა საერთოდ გათავისუფლებული, ერთი მათგანი საერთოდ პასუხისმგებლობისგან იქნა გათავისუფლებული, მცირე ნაწილს მიუსაჯეს მცირე სანქციები და საბოლოო ჯამში საზოგადოებამ ვერ მიიღო პასუხი, რა დონის სისტემურ პრობლემას ჰქონდა ადგილი ციხეში. აქედან გამომდინარე ნათლად ჩანს, რომ ეს იყო პოლიტიკური მანიპულაციის ერთ-ერთი იარაღი. რაც შეეხება ამ საქმის ფაბრიკაციას, ძალიან ძნელი წარმოსადგენია, რომ წამებაში და არაჰუმანურ მოპყრობაში ბრალდებულ ადამიანს ჰქონდეს საშუალება სამ ქვეყანაში იყოს მთავრობის კონსულტანტი, მას ჰქონდეს საშუალება შეხვდეს ძალიან ბევრ სამთავრობო დონის წარმომადგენელს, მათთან ერთად და საერთაშორისო არენაზე არასამთავრობო ორგანიზაციებთან ერთად მოამზადოს ძალიან ბევრი პროექტი, მათ შორის ადამიანის უფლებების სფეროში. ასევე ინტერპოლმა მიიღო გადაწყვეტილება ჩემი ძებნიდან მოხსნის შესახებ. ამიტომ ყველასთვის ცალსახაა, რომ ეს საქმე არის პოლიტიკური მანიპულაცია და არა რეალურ მტკიცებულებებზე დაფუძნებული", - აღნიშნა ადეიშვილმა.

ექს-მინისტრმა ბიძინა ივანიშვილის შესახებ რამდენიმე შეკითხვას უპასუხა.

ხელისუფლების შეთანხმებულ გადაბარებაზე ბიძინა ივანიშვილმა ჩვენგან უარი მიიღო, - აღნიშნა ადეიშვილმა.

მისი თქმით, ბიძინა ივანიშვილის სურვილი პოლიტიკაში მოსვლასთან დაკავშირებით "ნაციონალური მოძრაობისთვის" ჯერ კიდევ 2004 წლიდან იყო ცნობილი.

"ის პოლიტიკაში ყოველთვის მონაწილეობდა. მონაწილეობდა 2004-2005-2006 და შემდგომაც. კომუნიკაციის დონეზე ყოველვის იყო ინფორმაცია, მათ შორის მის მიერ გამოთქმული, რომ მას სურდა პოლიტიკაში აქტიური მონაწილეობა, რომ მას ზეგავლენა მოეხდინა გარკვეულ მოვლენებზე. პოლიტიკა არის მიმდინარე პროცესებზე ზეგავლენის მოხდენა და ის ამას აკეთებდა. აქედან გამომდინარე ეს ცალსახად ცნობილი იყო ჩვენთვის", - განაცხადა ზურაბ ადეიშვილმა.

მისივე თქმით, ბიძინა ივანიშვილი ხელისუფლების შეცვლას აპირებდა 2008-2009-2010 წლებშიც. "ხელისუფლებაში მოსვლა არის დემოკრატიული პროცესი და საქართველოს მოსახლეობა ნამდვილად იმსახურებს იმას, რომ სადღაც კულისებს მიღმა არ ფორმდებოდეს რაღაც გადაწყვეტილება ორ პოლიტიკურ ძალას, ან ორ ადამიანს შორის. ხელისუფლების გადაბარება, ბუნებრივია, ეს აბსოლუტურად მიუღებელი იყო. ჩვენთვის შეუძლებელია, რომ ვიღაცას ხელისუფლება აჩუქო, ან გადააბარო, ან მისცე ამის გაკეთების საშუალება. მან აირჩია გზა არჩევნების და შესაბამისად არჩევნების გზითაც მოვიდა ხელისუფლებაში. შეთანხმებული ხელისუფლების გადაბარებისგან მან მიიღო უარი", - განაცხადა ადეიშვილმა.

იუსტიციის ყოფილი მინისტრი ყოფილი ხელისუფლების მხრიდან ბიძინა ივანიშვილისთვის მოქალაქეობის გაუქმების გადაწყვეტილებას შეცდომად აფასებს.

როგორც ადეიშვილმა ტელეკომპანია "რუსთავი 2"-თან ექსკლუზიურ ინტერვიუში განაცხადა, მოქალაქეობის გაუქმების გადაწყვეტილება იყო ლეგიტიმური, თუმცა როდესაც მიდის პოლიტიკური პროცესები, იქ სამართლებრივი ინსტრუმენტები არ უნდა იყოს გამოყენებული.

"ბიძინა ივანიშვილისთვის მოქალაქეობის გაუქმების გადაწყვეტილება იყო ლეგიტიმური. ამ საქმესთან დაკავშირებით ყველა გადაწყვეტილება იყო სწორი, თუმცა პოლიტიკაში არის ადგილი მხოლოდ პოლიტიკური დისკუსიისთვის. როდესაც ხდება სამართლებრივი მექანიზმების ჩარევა, ეს არის არასწორი და არანაირ ეფექტს ეს არ იძლევა. ეს არ იყო პოლიტიკური გადაწყვეტილება, ეს იყო სამართლებრივი გადაწყვეტილება", - განახცადა ადეიშვილმა.

მისივე თქმით, ამ გადაწყვეტილებით რაიმე უპირატესობა "ნაციონალურ მოძრაობას" არ მიუღია. "ჩვენ რეაგირება გვქონდა მას შემდეგ, რაც ინფორმაცია მივიღეთ. თუმცა, ჯობია, როდესაც მიდის პოლიტიკური პროცესები, იქ სამართლებრივი ინსტრუმენტები არ იქნას გამოყენებული. მიუხედავად იმისა, რომ ჩვენ გვქონდა ინფორმაცია ამასთან დაკავშირებით, ჩვენი რეაგირება იყო შეცდომა", - აღნიშნა ადეიშვილმა.

ზურაბ ადეიშვილის განცხადებით, ბიძინა ივანიშვილი ყოფილი ხელისუფლების პერიოდში, პროკურატურას გარკვეული ადამიანების მეშვეობით ეკონტაქტებოდა.

მისი თქმით, ეს კონტაქტები ძირითადად იყო მაშინ, როდესაც საქმე ეხებოდა მის ბიზნეს ორგანიზაციებში გარკვეული პირების მხრიდან სისხლის სამართლებრივ დანაშაულს ან გარკვეული პირები ცდილობდნენ ქონების დატაცებას.

"ის გვეკონტაქტებოდა გარკვეული ადამიანების მეშვეობით, როდესაც ფაქტები არსებობდა სისხლის სამართლებრივ დანაშაულებთან დაკავშირებით, ასეთი არაპირდაპირი კონტაქტები იყო. მის ბიზნესორგანიზაციებში როდესაც ხდებოდა გარკვეული სამართალდარღვევები, როდესაც იყო გარკვეული ფაქტები ქონების დატაცების, ამასთან იყო დაკავშირებული ეს კონტაქტები", - განაცხადა ადეიშვილმა ჟურნალისტის კითხვის საპასუხოდ, რომელიც ეხებოდა იმას, იყო თუ არა ბიძინა ივანიშვილის მხრიდან პროკურატურასთან კონტაქტი გარკვეული პირების დაკავების თხოვნით.

იუსტიციის ყოფილი მინისტრი ადასტურებს, რომ ბიძინა ივანიშვილი მას და ვანო მერაბიშვილს სახლის ჩუქებას დაჰპირდა.

როგორც ადეიშვილმა ტელეკომპანია "რუსთავი 2"-თან ექსკლუზიურ ინტერვიუში განაცხადა, ამაზე განცხადებაც იყო გაკეთებული. მისივე თქმით, ის ასეთ შეთავაზებაზე არავისთან წასულა, რადგან ეს კორუფციაა.

"ნამდვილად არ მაქვს სახლი და მით უმეტეს არავის ნაჩუქარი, რადგან მინისტრისთვის, თუ ვინმე ჩუქნის სახლს, ეს არის მინისტრის მიერ ჩადენილი სისხლის სამართლის დანაშაული. ეს არის კლასიკური კორუფცია და ასეთ გარიგებაზე მე არავისთან არ წავედი", - აღნიშნა ადეიშვილმა.

იუსტიციის ყოფილი მინისტრი იმ შეცდომებს ასახელებს, რის გამოც "ნაციონალური მოძრაობა" "ქართულ ოცნებასთან" 2012 წლის საპარლამენტო არჩევნებში დამარცხდა. როგორც ადეიშვილმა განაცხადა, "ნაციონალური მოძრაობის" დამარცხების ბევრი მიზეზი იყო.

"მთავარი მიზეზი იყო ის, რომ ამომრჩეველი ამ 9 წლის განმავლობაში ძალიან გაიზარდა, ის გახდა უფრო მომთხოვნი. ძალიან ბევრჯერ ამბობენ, რომ ჩვენი გუნდი იყო უფრო წინ, ვიდრე საზოგადოების დანარჩენი ნაწილი და საზოგადოებას არ ესმოდა ამ პოლიტიკური გუნდის - ეს არასწორია. მე მგონი იყო პირიქით. საზოგადოება აყენებდა ახალ მოთხოვნებს, იყო პროგრესზე ორიენტირებული და ჩვენ ხანდახან ან ხშირად ვთავაზობდით მოძველებულ გადაწყვეტილებებს ამ პრობლემების მოსაგვარებლად. მაგალითად, როდესაც ჩვენ დავამარცხეთ კრიმინალი და კორუფცია, ჩვენ ვერ მოვახერხეთ, რომ შეგვეცვალა "ნულოვანი ტოლერანტობის" პოლიტიკა ლიბერალურ პოლიტიკაზე. ჩვენ როდესაც ვლაპარაკობდით, რომ პროგრესი გვქონდა უმაღლესი განათლების რეფორმაზე, დავაგვიანეთ სასკოლო განთლების რეფორმა", - აღნიშნა ადეიშვილმა.

მისივე თქმით, ყოფილმა ხელისუფლებამ რეფორმების მეორე ტალღა დააგვიანა. "საზოგადოების ინტერესებზე რეალური პასუხი ვერ გაეცა. ხშირ შემთხვევაში პასუხი ნამდვილად გაცემული იყო, მაგრამ ამომრჩეველი ითხოვს ყოველთვის უფრო მეტს, ის არის ორიენტირებული პროგრესზე და აუცილებელია მის ახალ მოთხოვნებს, მოწოდებებს და გამოწვევებს ახალი გადაწყვეტილებებით უპასუხო. როდესაც ვლაპარაკობთ იმაზე, რომ ჩვენ ძალიან სერიოზული წარმატებები გვქონდა ეკონომიკაში და გვქონდა სერიოზული ინფრასტრუქტურული გაუმჯობესება ქვეყანაში, ამავე დროს ვერ შევძელით მთავარი, რომ დაგვემარცხებინა უმუშევრობის პრობლემა, რაც მაშინაც მწვავედ იდგა ქვეყანაში. ამომრჩეველი ეცადა, რომ ეს ენახა სხვა პოლიტიკური ძალისგან", - აღნიშნა ადეიშვილმა.

იუსტიციის ყოფილი მინისტრის თქმით, ამავე დროს არ შეიძლება იმის დავიწყებაც, რომ ის ლოზუნგები და დაპირებები, რომლებიც მაშინ ოპონენტებს ჰქონდათ, იყო ძალიან მიმზიდველი. "ეს ეხება უფასო ჯანდაცვას, უფასო განათლებას, გაიაფებულ ტარიფებს, გაორმაგებული პენსია, უმუშევრობის დაძლევა, თუმცა დრო მოვიდა და აჩვენა ამომრჩეველს, რომ მდიდარმა ადამიანმაც კი შეუძლებელია მისცეს გარკვეული ფულადი რესურსები და შესაბამისად ამომრჩეველმა მიიღო ძალიან კარგი გაკვეთილი, რომ შეუძლებელია ასეთი ტიპის უპასუხისმგებლო მემარცხენე დაპირებების დაჯერება. იმედი მაქვს, მომავალში ამას ჩვენი ამომრჩეველი გაითვალისწინებს", - განაცხადა ადეიშვილმა.

ადეიშვილმა ზურაბ ჟვანიასა და სანდრო გირგვლიანის საქმეებზეც ისაუბრა.

სრული პასუხისმგებლობით ვაცხადებ, რომ ზურაბ ჟვანიას საქმეში არის ზუსტად ის, რაც იყო აღწერილი, - განაცხადა ადეიშვილმა.

აქედან გამომდინარე, მისი თქმით, რაიმე გასხვავებული დასკვნა ამ საქმესთან დაკავშირებით მოსალოდნელი არ არის.

"რაც შეეხება ზურაბ ჟვანიას საქმეს, სრული პასუხისმგებლობით ვაცხადებ, რომ ამ საქმეში არის ზუსტად ის, რაც იყო აღწერილი ძალიან სწორად. რაიმე განსხვავებულ დასკვნას ნამდვილად არ უნდა ველოდოთ", - აღნიშნა ადეიშვილმა.

მისივე თქმით, უნდა ითქვას ისიც, რომ ამავე დროს იყო დელიკატური, პერსონალური ინფორმაციები, რომლებსაც საქმისთვის გადამწყვეტი მნიშვნელობა არ ჰქონდა და არ იქნა ასახული გამოძიების გარკვეულ მასალებში. ამასთან, ადეიშვილის განცხადებით, იმ სახლთან დაკავშირებით, სადაც ჟვანია გარდაცვლილი იპოვეს, ოჯახის წევრები ნამდვილად იყვნენ საქმის კურსში.

სანდრო გირგვლიანის საქმე იყო ყველაზე დიდი კითხვის ნიშანი, რომელიც გაჩნდა ჩვენი ხელისუფლების მიმართ, - აღნიშნა ადეიშვილმა.

მისი თქმით, სანდრო გირგვლიანის საქმე იყო ძალიან მძიმე. "ეს იყო ყველაზე დიდი კითხვის ნიშანი, რომელიც გაჩნდა ჩვენი ხელისუფლების მიმართ. ამ ფაქტზე არანაკლებ მძიმე იყო ის რეაგირება და ნაბიჯები, რომელიც ჩვენ გავაკეთეთ ამის შემდეგ იმიტომ, რომ დაგვიანდა რეაგირება. ვერ მოვახერხეთ უფრო გამჭვირვალე, უფრო ღია გამოძიების ჩატარება. შესაბამისად, ვერ შევძელით ის, რომ საზოგადოება დაგვერწმუნებინა, რომ ყველა ის დამნაშავე, რომელიც ამ ფაქტთან დაკავშირებით მონაწილეობდა, დაისაჯა და ბუნებრივად, შედეგად მივიღეთ ის, რომ ამომრჩეველში იმ პერიოდში და შემდეგაც გაჩნდა კითხვის ნიშნები ჩვენს ნდობასთან დაკავშირებით", - აღნიშნა ზურაბ ადეიშვილმა.

მისივე თქმით, მაშინ ხელისუფლებაში ყველა თვლიდა, რომ ამ საქმის გამოძიებასთან დაკავშირებით ყველაფერი კეთდებოდა. "ჩვენ მაშინ ვთვლიდით, რომ ვაკეთებდით ყველაფერს იმისათვის, რომ ეს საქმე ბოლომდე ყოფილიყო გამოძიებული, მაგრამ კიდევ ერთხელ ვამბობ, რომ სერიოზული პრობლემები გვქონდა გამჭვირვალობასთან დაკავშირებით, ღიაობასთან დაკავშირებით. კარგი იქნებოდა ალბათ ის, რომ ეს საქმე მთლიანად ღია ყოფილიყო მოქალაქეებისთვის, მიგვეწოდებინა ყოველდღიურად ინფორმაცია ამ საქმესთან დაკავშირებით. ბუნებრივია, იმის გამო, რომ ეს შეცდომები იქნა დაშვებული, ნდობაც ჩვენს მიმართ დადგა კითხვის ნიშნის ქვეშ. უკვე აღარანაირი მნიშვნელობა არ აქვს რაში ვარ მე დარწმუნებული ან რეალურად გავაკეთეთ თუ არა ყველაფერი ჩვენს ხელთ არსებული შესაძლებლობებით, რომ ეს გამოძიება მიყვანილი ყოფილიყო ბოლომდე. რეალურად საზოგადოებაში გაჩნდა სერიოზული კითხვის ნიშნები", - განაცხადა ადეიშვილმა.

იხილეთ ვიდეოები:

ტეგები თემაზე:

ზურაბ ადეიშვილი