ახალგაზრდებმა მეტროში სიმღერით თბილისის სტიქიით დაზარალებულთათვის 2 000 ლარი შეაგროვეს
ახალგაზრდები სხვადასხვა საკრავითა და ტრანსფარანტებით მეტროსადგურ "ვაგზლის მოედანზე" გაერთიანდნენ. მათ უმრავლესობას მუსიკალური განათლება არ აქვს, თუმცა კავკასიის საერთაშორისო უნივერსიტეტის სტუდენტური თვითმმართველობის წევრები და მე-11 საჯარო სკოლის მოსწავლეები სტიქიით დაზარალებულებულთა დასახმარებლად ბაქანზე უკრავენ და მღერიან.
მგზავრების უდიდესი ნაწილი სოლიდარულია. დაფენილ გიტარის კონვერტზე გამვლელები ხურდას, რამდენიმე ლარს და უცხოურ ვალუტასაც ტოვებენ. ზოგიერთს ცრემლების შეკავება უჭირს.
შედეგიც შესამჩნევია - რამდენიმე საათის განმავლობაში ახალგაზრდებმა 2 000 ლარის შეგროვება მოახერხეს.
როგორც Ambebi.ge-ს კავკასიის საერთაშორისო უნივერსიტეტის სტუდენტური თვითმმართველობის წარმომადგენელმა გურამ ყანდორელაშვილმა განუცხადა, სტუდენტებსა და მე-11 სკოლის მოსწავლეებს მეგობრობა აკავშირებთ და დაზარალებულთა დახმარება ერთობლივად გადაწყვტეს. დღეიდან მათ სხვა უნივერსიტეტები შეუერთდებიან.
სტუდენტები თანხის ნაწილ-ნაწილ გაცემას არ აპირებენ და ვარაუდობენ, რომ ერთ კვირაში 100 000 ლარს შეაგროვებენ, რითაც ერთი ან ორი დაზარალებულისთვის საცხოვრებელი ბინის შეძენას გეგმავენ.
სტუდენტები და მოსწავლეები ტრანსფარანტებით - "დავეხმაროთ სტიქიით დაზარალებულ ოჯახებს", "გავიღოთ ქველმოქმედება", "თბილისში ცრემლები წვიმს", "გვჭირდება ფული დაზარალებულთა დასახმარებლად", "დღეს ჩვენთანაც წვიმს" - დედაქალაქის მეტროში აქტივობას გეგმავენ.
ნატალია დადიანი
Ambebi.ge
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
