გიორგი მარგველაშვილი - ნებისმიერი ხელოვნური და ძალადობრივად აგებული კედელი ადრე თუ გვიან ინგრევა

ევროპის ისტორიიდან ვიცით, რომ ნებისმიერი ხელოვნური და ძალადობრივად აგებული კედელი ადრე თუ გვიან ინგრევა, - ამის შესახებ საქართველოს პრეზიდენტმა, გიორგი მარგველაშვილმა ავლაბრის სასახლეში განაცხადა, სადაც ევროპული საბჭოს პრეზიდენტ, დონალდ ტუსკის ევროკავშირის მისიის ეგიდით ცენტრალური აფრიკის რესპუბლიკაში განთავსებული საქართველოს სამშვიდობო კონტიგენტი წარუდგინა.

ქვეყნის პირველმა პირმა საქართველოს ოკუპაციასა და რუსეთის ქმედებებზე გაამახვილა ყურადღება და განმარტა, რომ საქართველო საკუთარ ქვეყანაშიც იმ სიმშვიდის და სტაბილურობის შექმნის გარანტი იქნება, რის უზრუნველსაყოფადაც გლობალური მასშტაბით ყოველდღიური წვლილი შეაქვს.

"ჩვენი სახელმწიფოს ტერიტორიაზეც სამწუხაროდ და ისტორიული სამართლიანობის საპირისპიროდ დგას ოკუპანტის ჯარი, ჯარი რომლისთვისაც იოლია ყოველდღიურად გაუგებარი მიზეზების გამო პროვოკაციის მოწყობა და უმტკივნეულეს საკითხებზე, რომლებიც ჩვენ თითოელ მოქალაქეს შეეხება თამაში, იქნება ეს სრულიად უკანონოდ და ისტორიული ლოგიკის საწინააღმდეგოდ მავთულხლართების გავლებით თუ ყოველგარ შინაარს მოკლებული ბანერების გადაწევა-გადმოწევით. ბატონო პრეზიდენტო, ჩვენ ვართ ევროპის ნაწილი. ევროპაში ყოფილა აღმართული კედლები, რომლებიც ადამიანებს და სახელმწიფოებს ყოფს, მაგრამ ჩვენ ჩვენი და ევროპის ისტორიიდან ვიცით, რომ ნებისმიერი ასეთი ხელოვნური და ძალადობრივად აგებული კედელი ადრე თუ გვიან ინგრევა. ჩვენ მშვიდად, რაციონალურად და ყურადღებით დავაკვირდებით ამ პროცესს და ვიქნებით საქართველოშიც იმ სიმშვიდის, იმ სტაბილურობის შექმნელი და გარანტი, რომელიც ისტორიულად გვეკუთვის ჩვენ და რომლის დადგომაშიც ყოველდღიური წვლილი შეგვაქვს", - მიმართა გიორგი მარგველაშვილმა დონალდ ტუსკის.

მან ევროპული საბჭოს პრეზიდენტს საქართველოში ჩამოსვლისთვის მადლობა გადაუხადა და კიდევ ერთხელ განმარტა, რომ საქართველოს მიზანი და ისტორიული მისიაა, დაუბრუნდეს ევროპულ ოჯახს.

"ბატონო პრეზიდენტო, კიდევ ერთხელ მინდა გითხრათ მადლობა საქართველოში ჩამობრძანებისთვის, იმისთვის, რომ თქვენი პირადი ინიციატივით იმყოფებოდით იქ, სადაც ირღვევა საერთაშორისო სამართლის ლოგიკა, ისტორიული სამართლიანობა. ჩვენი მიზანი და ისტორიული მისიაა, რომ საქართველო ბურნებრივად დაუბრუნდეს თავის ადგილს - ევროპულ ოჯახთა თავისუფალ გაერთიანებას, რაც აუცილებლად მოხდება", - აღნიშნა საქართველოს პრეზიდენტმა.