კარბელაშვილის სიმთვრალე სიმთვრალეა და გუბერნატორის მოადგილისა - არა?! - პატრულისთვის "ნაცები" მთვრალები არიან და "ქოცები" - არა?!

გუშინ საღამოს დეპუტატი გიორგი კარბელაშვილი დააკავეს, რომელიც შსს-ს განცხადებით, ნასვამ მდგომარეობაში მართავდა ავტომობილს, ამავე განცხადების მიხედვით, მან პოლიციას წინააღმდეგობა გაუწია და მხოლოდ იმის გამო არ გადაიყვანეს საპატიმროში, რომ მას დეპუტატის იმუნიტეტი იცავდა. ცალსახაა, რომ ნასვამ მდგომარეობაში ავტომობილის მართვის გამო ადამიანი, ვინც არ უნდა იყოს, დასაჯარიმებელია, თუმცა არის ერთი საინტერესო გარემოება - ცოტა ხნის წინ, ქუთაისში, ყინულის მოედანთან, იმერეთში სახელმწიფო რწმუნებულის გუბერნატორის მოადგილე იოსებ ხახალეიშვილი პატრულის თანამშრომლებმა გააჩერეს, რომელიც როგორც თვითმხილველები აცხადებენ, სავარაუდოდ, ნასვამ მდგომარეობაში იმყოფებოდა.

თვითმხილველების თქმით, იოსებ ხახალეიშვილს პატრულის თანამშრომლები რამდენიმე წუთის განმავლობაში კითხავდენ. შემთხვევის ადგილას იმერეთის გუბერნატორის, გივი ჭიჭინაძის ავტომანქანაც გამოჩნდა. გუბერნატორი რამდენიმე წუთის განმავლობაში ესაუბრებოდა პატრულის ეკიპაჟის თანამშრომლებს, შემდეგ კი ის იოსებ ხახალეიშვილის ავტომანქანაზე საჭესთან დაჯდა და ხახალეიშვილთან ერთად შემთხვევის ადგილიდან გავიდა.

სრული ინფორმაცია| პატრულმა ნასვამ მდგომარეობაში მყოფი მაღალჩინოსანი გააჩერა და დაინდო? - თვითმხილველის მონაყოლი და ფოტომასალა

რა თქმა უნდა, იბადება კითხვა, კარბელაშვილის სიმათვრალე სიმთვრალეა და გუბერნატორის მოადგილისა - არა?! თუ ისევ წრეზე ვტრიალბეთ და ის რაც ეპატიება იუპიტერს, არ ეპატიება ხარს ( 2012 წლამდე იუპიტერი "ნაციონალური მოძრაობა" იყო და ხარი "ქართული ოცნება", ახლა პირიქითაა)?!

ასე არათუ ვერ გავფრინდებით, ნელ-ნელა გადაადგილებაც გაგვიჭირდება. ხვალ-ზეგ აღარც კარბელაშვილი იქნება ქართული პოლიტიკის ავანგარდში და აღარც გუბერნატორის მოადგილე იქნება ხახალეიშვილი, მაგრამ მათ მიერ იდეოლოგიად ქცეული, ორმაგი სტანდარტის ტყვეობიდან თავის დაღწევა ძალიან რთული იქნება.

ისიც ორმაგი სტანდარტია, როდესაც აგრეთვე დეპუტატი გიორგი ბარამიძე, ქართველ სამართალდამცავს "ძაღლს" უწოდებს. გულწრფელად მაინტერესებს, ანალოგიური რომ მე გავაკეთო, ასეთივე ლმობიერი იქნება პოლიცია და მხოლოდ მომისმენს, თუ კანონის სრული დაცვით იმოქმედებს (ეჭვი მაქვს, ჩემს შემთხვევაში, კანონსაც გადაამეტებს და გვარიანადაც მომდებს)?! ესეც ორმაგი სტანდარტია და სხვა არაფერი.

დაკავებისას ბატონ კარბელაშვილს უთქვამს, ქართველი გმირის საფლავზე დავლიეო. პაპაჩემიც გმირი იყო, მართალია არა 2008 წლის მოვლენების, მაგრამ არა მგონია ეს დიდად ცვლიდეს მოცემულობას, სიცოცხლის ბოლომდე ყუმბარის ნამსხვრევები ჰქონდა ფეხში. ჰოდა, ერთ დღეს ბაბუის საფლავზე დავლიე და სახლში გვიან ღამით ვბრუნდებოდი, პოლიციამ დამაჯარიმა, რადგან ნასვამი ხარ და დიდი ალბათობით წესრიგს დააღვევო, კარბელაშვილისაგან განსხვავებით, მე ფეხით მოვდიოდი. ბატონო გიორგი, ეს ხდებოდა მაშინ, როცა თქვენ იყავით ხელისუფლებაში და მაშინ რატომღაც არ იყო გასამართლებელი გმირის საფლავზე სასმელის დალევა. თქვენ მიიღეთ გამამართლებელი კანონი, თუ ისევ ყბადაღებულ ორმაგ სტანდრატს მივადექით?!

ქართული მულტფილმია "კატა და ლომი", სადაც კატა ასწავლის ლომს ხეზე ასვლას, აქ ერთი პასაჟია, სადაც ლომის ბოკვერი დააშავებს, მაგრამ სხვას სჯიან, ხოლო მეფე ამბობს: "აბა ჩემ შვილს ხომ არ დავსჯი?!" სამწუხაროა, რომ ეს ფრაზა დღემდე აქტუალურია და კიდევ უფრო სამწუხარო ისაა, კარგა ხანს არ დაკარგავს აქტუალობას, ამასობაში კი ევროპა არ წყვეტს განვითარებას და ჩვენს შორის არსებული სხვაობა უფრო და უფრო იზრდება.

ლადო გოგოლაძის სვეტი

AMBEBI.GE