გასარუჯად დამზადებული ნახარშისგან რძალ-მულმა 2-3 ხარისხის დამწვრობა მიიღო

გარუჯვის მიზნით დამზადებული ნახარშისგან მიღებული დაზიანებებით დამწვრობის ცენტრში გადაყვანილი რძალ-მულის მდგომარეობა სტაბილურია. როგორც "ინტერპრესნიუსს" იაშვილის სახელობის თერმული დაზიანებისა და აღდგენითი პლასტიკური ქირურგიის ხელმძღვანელმა გუგა ქაშიბაძემ განუცხადა, გუშინ ცენტრში ორი საშუალო ასაკის ქალი შეიყვანეს, რომელთაც გასარუჯად "ახალი ფორმულა" გამოიყენეს. ქაშიბაძის განცხადებით, დამწვრობა 2-3 ხარისხის იყო.

"ქალებმა სხეულზე წაისვეს სითხე, რომელიც ამ შემთხვევაში არა ლეღვის ნახარში, არამედ სხვა ინგრედიენტებისგან იყო დამზადებული. სითხის შემადგენლობაში შედიოდა: ძმარი, სოდა, მარილი, ასევე გაზირებული სასმელი, თუმცა ყველაფერს არ ჩამოვთვლი, რადგანაც კვლავ ვინმემ არ დაამზადოს. ამ ყველაფრისგან დამზადებული სითხე წაისვეს ზედა და ქვედა კიდურებზე და მიიღეს 2-3 ხარისხის დამწვრობა. ამჟამად მათი მდგომარეობა სტაბილურია და მკურნალობას ექვემდებარება", - განაცხადა გუგა ქაშიბაძემ.

"ინტერპრესნიუსი"