საქართველოში სუროგაციით სარგებლობა 41 წელს გადაცილებულ ქალებსა და უცხო ქვეყნის მოქალაქეებს აეკრძალებათ?
ერთ თვეში ჯანდაცვისა და იუსტიციის სამინისტროები სუროგაციის შესახებ ახალ კანონპროექტზე მუშაობას დაასრულებენ. კანონპროექტი ჯერ კიდევ დამუშავების პროცესშია, თუმცა კლინიკების ხელმძღვანელები და არასამთავრობო ორგანიზაციები უკმაყოფილებას უკვე გამოთქვამენ.
კანონპროექტის თანახმად, დამხმარე რეპროდუქციული ტექნოლოგიებით სარგებლობის უფლება მხოლოდ ქორწინებაში მყოფ ქალბატონებს ექნებათ, რომელთა ასაკი 41 წელს არ აღემატება, მამაკაცებისთვის კი ასაკობრივი ზღვარი 47 წლამდე განისაზღვრა. აღსანიშნავია ისიც, რომ სუროგაცია და დონაცია შესაძლოა აეკრძალოთ უცხოეთის მოქალაქეებსაც. ეს არის ის ძირითადი მიზეზები, რის გამოც არასამთავრობო ორგანიზაციები და კლინიკების ხელმძღვანელები უკმაყოფილებას გამოთქვამენ.
ჯანდაცვის სამინისტროს პრესსამსახურში კონკრეტულ დეტალებზე საუბარი არ ისურვეს, მხოლოდ ის გვითხრეს, რომ ჯერ კიდევ ბევრი საკითხია განსახილველი და ამ ეტაპზე ახალ კანონპროექტზე მუშაობა აქტიურად მიმდინარეობს.
სუროგაციისა და დონაციის ცენტრებში ამ კანონპროექტს არ იზიარებენ და ასაკობრივი ზღვარის შეზღუდვა ყველაზე დიდ დანაშაულად მიაჩნიათ.
"არც ერთი კომპანია და კლინიკა ამ კანონპროექტს არ ვეთანხმებით, მით უმეტეს, ასაკობრივ ზღვართნ დაკავშირებით. ვფიქრობთ, რომ ეს არ არის ის ასაკი, როდესაც ქალს შვილის ყოლის უფლება უნდა შეუზღუდო. მაგ კონკრეტულ ასაკამდე პაციენტები ექიმთან არ მიდიან და მით უმეტეს არ მიმართავენ ხელოვნურ განაყოფიერებას. გამოდის, რომ 38 000 უშვილო წყვილიდან 50 პროცენტს ვართმევთ შვილის ყოლის უფლებას. თან იმ პირობებში, როდესაც საქართველოში ისედაც გამრავლების პრობლემაა. შესაძლოა, ქალი 38 წლის გათხოვდეს და 2-3 წელი ექიმს არ მიაკითხოს და შემდგომ უკვე გვიანი აღმოჩნდეს. ასევე სამწუხაროა, რომ შესაძლოა სუროგაცია და დონაცია უცხო ქვეყნის მოქალაქეებსაც შეეზღუდოთ, იქიდან გამომდინარე, რომ სამედიცინო ტურიზმი ერთ-ერთი სფეროა, საიდანაც ბიუჯეტში დიდი რაოდენობით თანხები შედის, როგორც ტურიზმის მხრივ, ასევე სამედიცინო თვალსაზრისით. აქედან გამომდინარე, ვფიქრობ, რომ ძალიან სერიოზული პრობლემაა ჩვენი მთავრობისთვის", - აცხადებენ სუროგაციის ცენტრებში.
თიკო გურაშვილი
AMBEBI.GE
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
