ტოვებენ თუ არა "რუსთავი 2"-ს ჟურნალისტები სკანდალური ჩანაწერის გამო

უკრაინული გამოცემა uareview.in.ua-ს მიერ გამოქვეყნებული სკანდალური აუდიოჩანაწერის შემდეგ რამდენიმე საინფორმაციო სააგენტომ გაავრცელა ინფორმაცია, რომლის მიხედვით "რუსთავი 2"-ს ჟურნალისტები ტოვებენ.

გავრცელებულ ინფორმაციას არ ადასტურებს "რუსთავი 2"-ის საინფორმაციო სამსახურის ხელმძღვანელი გიორგი ლაფერაშვილი.

"ჟურნალისტები "რუსთავს" ტოვებენ" ისეთივე სიმართლეა, როგორც ლევან ბერძენიშვილია მკვდარი! ( ღმერთმა დღეგრძელად გამყოფოთ, ბატონო ლევან)", - წერს ლაფერაშვილი.

არხის დატოვებისკენ მოუწოდებს ჟურნალისტებს არჩილ გამზარდია. მისი თქმით, წინააღმდეგ შემთხვევაში, "მათი ფასი კაპიკიც არ იქნება".

Facebook/არჩილ გამზარდია:

"თუ ამ ყველაფრის მერე "რუსთავი 2"-ის ჟურნალისტები არ დაწერენ განცხადებას და არ წამოვლენ სამსახურიდან, მათი ფასი კაპიკიც არ ღირებულა მაშინ", - წერს გამზარდია.

შეგახსენებთ, რომ სკანდალურ ჩანაწერს ტელევიზია სპეციალური განცხადებით გამოეხმაურა. "უპირველეს ყოვლისა ჩვენ კატეგორიულად ვემიჯნებით ნებისმიერი სახის ძალადობრივი სცენარის განვითარებას. ჩვენი სარედაქციო პოლიტიკა არ უკავშირდება არც ერთი პოლიტიკური ძალის მიზნებს და ჩვენი მიზანია მხოლოდ ის, რომ მოგვეცეს საშუალება სრულფასოვნად შევასრულოთ ჟურნალისტებზე დაკისრებული მოვალეობები, რაც უპირველეს ყოვლისა ქვეყანაში მიმდინარე მოვლენების ობიექტურად გაშუქებას გულისხმობს. ჩვენთვის კატეგორიულად მიუღებელია ნებისმიერი სახის ძალადობრივი ქმედება, ვისი მხრიდანაც არ უნდა იყოს ინიცირებული. ამ შემთხვევაში სწორედ ჩვენ ვართ ფიზიკური ანგარიშსწორების საფრთხის ქვეშ. იმ შემთხვევაში თუ არ იქნება აცილებული თავიდან ძალადობრივი ქმედებები, ასეთი საფრთხის არსებობის შემთხვევაში, პასუხისმგებლობა მთლიანად ხელისუფლებას დაეკისრება.

ასევე მოვითხოვთ ხელისუფლებამ განმარტოს ამ ჩანაწერების წარმომავლობა, მოპოვების კანონიერება და ის, თუ როგორ მოხვდა ეს აუდიო მასალა უკრაინულ ინტერნეტ სივრცეში. ასევე ვითხოვთ დამატებით გამნმარტებებს, რატომ არ გაასაჯაროვა ეს ჩანაწერები მათი მოპოვებისთანავე, რამდენადაც ჩანაწერებიდან სავარაუდოდ ცნობილი ხდება, რომ შესაძლოა მათი შინაარსი ამ ქვეყნის მოქალაქეების სიცოცხლისათვის საფრთხის შემცველი ყოფილიყო. ჩვენ ვაცხადებთ, რომ შევინარჩუნებთ დამოუკიდებელ სარედაქციო პოლიტიკას და გვინდა ყველას შევახსენოთ, რომ ჩვენი და თავისუფალი სიტყვის დაცვის ერთდაერთი საშუალება მხოლოდ კამერა და მიკროფონია. მოვუწოდებთ სამაუწყებლო კომპანიის ხელმძღვანელობას, შესაძლო გართულებების თავიდან ასაცილებლად, არ დაუშვას ტელეკომპანიის ტერიტორიაზე უცხო პირები, მათ შორის ჩვენი მხარდამჭერები,"- ნათქვამია განცხადებაში.