ინტერვიუ ქართველ ძალოსანთან, რომელმაც მსოფლიოს ჩემპიონატზე ორჯერ დაკარგა გონება
ცოტა ხნის წინ აშშ-ის ქალაქ ჰიუსტონში ძალოსანთა მსოფლიო ჩემპიონატი გაიმართა, რომელშიც საქართველოს ნაკრებმაც მიიღო მონაწილეობა. ჩვენი ნაკრების შემადგენლობაში იყო შოთიკო მიშველიძეც, რომელიც საქართველოს რამდენიმეგზის რეკორდსმენი და 20 წლამდელთა ევროპის ჩემპიონატის ვერცხლის მედალოსანია.
საქართველოს ნაკრებმა რიოს ოლიმპიადის სამი ლიცენზია მოიპოვა, თუმცა თავად შოთიკოსთვის მსოფლიო ჩემპიონატი წარუმატებელი გამოდგა, - შტანგის აწევის დროს ორჯერ დაკარგა გონება. AMBEBI.GE თავად შოთიკოსთან შეეცადა მიზეზის გარკვევას:
- წლევანდელ მსოფლიოზე ჩემი და სამწვრთნელო შტაბის მთავარი მიზანი იყო რიოს 2016 წლის ოლიმპიადისთვის სალიცენზიო ქულების მოპოვება, თუმცა ჩემდა სამწუხაროდ, ცნობილი ინციდენტის გამო ქულების მოპოვება ვერ მოვახერხე.
- რატომ დაგემართა ეს ინციდენტი?
- მარცხენა მხარის ტრამვა მქონდა, თუმცა ძალიან რთული მდგომარეობა არ იყო და ამიტომ გადავწყვიტე, რომ შეჯიბრზე წავსულიყავი. სხვათა შორის, გონება უშუალოდ ფიცარნაგზე გამოსვლამდე ცოტა ხნით ადრე, გასახურებელ დარბაზშიც დავკარგე, მერე მწვრთნელებმა თქვეს, რომ აღარ მიმეღო მონაწილეობა, რადგან მოერიდნენ კუნთის დაზიანებას, თუმცა მე ვთქვი, რომ მოვახერხებდი გამოსვლას და გამოვედი კიდეც. 160 კგ შევუკვეთე რომ ამეწია, მაგრამ აწევისას იყო იმდენად გაუსაძლისი ტკივილი, რომ გონება დავკარგე და წავიქეცი. სამწუხაროდ, ასეთი რამ მერე უკვე მეორედაც დამემართა.
- ზოგადად თუ ხდება ხოლმე მსგავსი ფაქტები?
-კი, არის მსგავსი შემთხვევები. სპორტია და აქ ყველაფერია მოსალოდნელი.
- იმ ვიდეოს, სადაც შენ გონებას კარგავ, ხალხის ნაწილი ირონიულად შეხვდა. ბევრმა დაგცინა კიდეც, როგორი იყო შენი რეაქცია?
- სიმართლე გითხრათ საერთოდ არავისაგან მწყენია, პირიქით, მე თვითონაც დავცინე ჩემ თავს. ვიღაცას გაეცინა და გაიცინოს, მე არც ამით დამიწყია სპორტი და არც ამით ვამთავრებ. ნამდვილად არ ვაპირებ, ყველას ვინც გაიცინა ავუხსნა, რატომ დამემართა ეს. თუ გაეცინათ ძალიან კარგია, სიცოცხლეს გაიხანგრძლივებენ სიცილით. ამ ფაქტის გამო არ ამცრუებია გული და კიდევ უფრო დიდი შემართებით ვაგრძელებ ვარჯიშს.
- საზოგადოების გარკვეულმა ნაწილმა ძალოსანი შოთიკო მიშველიძე სწორედ ამ ვიდეოთი გაიცნო, შენთვის რამდენად მისაღებია, რომ ასეთი ფაქტით გაგიცნეს?
- ნამდვილად არასოდეს ყოფილა ჩემი მიზანი პოპულარობის მოხვეჭა, უბრალოდ, მინდა სპორტის ამ სახეობაში წარმატებას მივაღწიო. სიმართლე რომ ვთქვა, არ ვთვლი თავს პოპულარულად, არც ამ ვიდეოს მერე გავუცნივარ ხალხს იმ დოზით, რომ თავი პოპულარულ ადამიანად მივიჩნიო.
- სამომავლო გეგმები რა გაქვს?
- ახლა შეკრებაზე ვარ და ვვარჯიშობ. უახლოესი ევროპის ჩემპიონატისთვის ვემზადები, რომელიც აპრილში ტარდება.
- მსოფლიოს ჩემპიონატზე სამი ლიცენზია მოიპოვეთ. რა გეგმები გაქვთ რიოს ოლიმპიადაზე?
- რადგან გვაქვს სამი ლიცენზია, სამი საუკეთესო სპორტსმენი წავა ოლიმპიადაზე, ანუ ლიცენზიები ერთ კონკრეტულ წონაში არაა. მე წავალ თუ არა, არ ვიცი, მგონი - ვერა, რადგან ბევრი სპორტსმენია ჩემზე გაცილებით უკეთეს ფორმაში და ისინი უნდა წავიდნენ, ვინც უფრო უკეთ იქნება მომზადებული.
ლადო გოგოლაძე
AMBEBI.GE
გამოიწერეთ საზოგადოების სიახლეები და იხილეთ ის თქვენს Newsfeed-ში!
AMBEBI.GE/საზოგადოება
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
