როგორ ცხოვრობენ მონაზვნები, რომელთაც მარიხუანას პლანტაცია აქვთ

კრისტინ მიუსენი, რომელსაც და ქეითად მოიხსენიებენ, კერძო კათოლიკურ სკოლაში სწავლობდა და მისი მასწავლებლები მონაზვნები იყვნენ. „ბიზნეს ინსაიდერი“ წერს, რომ დებთან ერთად ცხოვრება მისთვის მიმზიდველი იყო და ამჟამად 58 წლის და ქეითი „თვითმარქვია“ მონაზონია, ის კათოლიკური ეკლესიის წევრი არ არის.

ქეითის ორგანიზაციას Sisters of the Valley („მინდვრის დები“) ჰქვია და მონაზვნებს სამედიცინო მიზნებისთვის კალიფორნიაში მარიხუანა მოჰყავთ. და ქეითის მისიაა, გააქროს მცენარესთან დაკავშირებული ნეგატიური სტიგმა და შექმნას სამუშაო ადგილები ქალებისთვის, ვისაც მისი სამკურნალო თვისებების სჯერა.

მონაზვნების შემოსავალი 2016 წელს 750,000 დოლარი იყო.

„არ აქვს მნიშვნელობა, რას ვკითხულობთ მარიხუანის შესახებ ბოლო 20 წლის განმავლობაში, ყურადღებას არ ვაქცევთ, რადგან ვიცით, რომ სამკურნალო მცენარეს ვზრდით,“ - ამბობს მონაზონი.

მათ მიერ შექმნილი პროდუქტის შეძენა ონლაინაც არის შესაძლებელი. ვებ-გვერდზე აღნიშნულია, რომ „სამკურნალო საშუალებებს“, საპნებს, სპრეებსა და სხვა პროდუქციას დები მთვარის ციკლისა და „ძველი სიბრძნის“ გათვალისწინებით ქმნიან.