რატომ ჰქონდა წყალს სუნი თბილისის ზოგიერთ უბანში 14-15 მაისს

რატომ ჰქონდა წყალს სუნი თბილისის ზოგიერთ უბანში 14-15 მაისს

"ყარს წყალი! რომელ რეგლამენტსა და რომელ მოთხოვნებშია დაშვებული აშმორებული წყლის მიწოდება მოსახლეობისთვის?! არათუ სასმელად, ხელის დასაბანადაც შეეზიზღება ადამიანს. თემქა და მუხიანის წყალსადენზე მე პირადად დავაფიქსირე და იმის შემდეგ წყალს ვეღარ ვსვამ"; "საშინელი თევზის სუნი აქვს წყალს... ცხელ ხაზზე მითხრეს, ლაბორატორიულად შემოწმებულია და ვარგისია სასმელადო, თან ისიც დააყოლეს 2-3 დღეში გამოსწორდებაო. თუ ხარისხიანია, რა უნდა გამოსწორდეს? თან ფაქტია, რომ საშინელი თევზის სუნი აქვს... გავიდა 2-3 დღე..." - მსგავსი შინაარსის კომენტარებს ნახავთ კომპანია "ჯორჯიან უოთერ ენდ ფაუერის" "ფეისბუქის" ოფიციალურ გვერდზე თბილისელები, რომელთა ინფორმაციით, 14-15 მაისს დედაქალაქის რამდენიმე უბანში სასმელ წყალს გემო და სუნი ჰქონდა შეცვლილი.

წყლის ხარისხის ცვლილებაზე ჩივიან ორთაჭალის, თემქის, მუხიანის, დიღმის, ვარკეთილის და სხვა უბნების მაცხოვრებლებიც. რამ გამოიწვია სუნის გამკვეთრება და მოგვარდა თუ არა პრობლემა, Ambebi.ge "ჯორჯიან უოთერ ენდ ფაუერს" დაუკავშირდა. როგორც კომპანიაში განაცხადეს, წყლის ორგანოლეპტიკური თვისებების (სუნისა და გემოს) გამძაფრება ხანმოკლე პერიოდში წყლის ტემპერატურის მკვეთრმა მატებამ გამოიწვია. მათი ინფორმაციით, ასეთი შემთხვევები რამდენიმე წლის წინაც დაფიქსირდა.

ასევე წაიკითხეთ: "ჯორჯიან უოთერ ენდ ფაუერის" განცხადება თბილისში წყლის ხარისხთან დაკავშირებით

"კომპანიას აქვს მსგავსი სიტუაციების მართვის გამოცდილება. ასეთ დროს გამოიყენება აპრობირებული მეთოდი - წყლის გააქტივებული ნახშირით დამუშავება. დღეის მდგომარეობით, აღნიშნულ საკითხზე მოსახლეობა, მხოლოდ ერთეულ შემთხვევებში მოგვმართავს. აბონენტს შეუძლია დაუკავშირდეს კომპანიას ცხელი ხაზზე - 293 11 11. კომპანიის ლაბორატორიის წარმომადგენლები, კონკრეტულ მისამართზე, აბონენტის ონკანიდან აიღებენ წყლის სინჯს".

კომპანიის ცნობით, თბილისში, სასმელი წყლის ხარისხის პარამეტრები უცვლელია: "კომპანია "ჯორჯიან უოთერ ენდ ფაუერი" სრული პასუხისმგებლობით აცხადებს, რომ წყლის ხარისხის პარამეტრები უცვლელია. სასმელი წყლის ხარისხი დედაქალაქში აბსოლუტურად აკმაყოფილებს ჯანმრთელობის მსოფლიო ორგანიზაციის რეკომენდაციებს და ეროვნული რეგლამენტის მოთხოვნებს. "ჯორჯიან უოთერ ენდ ფაუერის" მაკონტროლებელი ცენტრალური ქიმიურ-მიკრობიოლოგიური ლაბორატორიის მიერ, 24-საათიან რეჟიმში, ყოველ ნახევარ საათში ერთხელ ხდება წყლის ხარისხის შემოწმება და ყველა პარამეტრი მკაცრად არის დაცული", - განგვიმარტეს კომპანიაში.

ეკოლოგ ლაშა ჩხარტიშვილის თქმით, დედაქალაქში წყლის ხარისხთან დაკავშირებით გარკვეული პრობლემებია. "შეიძლება ითქვას, რომ სასმელი წყლის მდგომარეობა თბილისში დამაკმაყოფილებელია, მაგრამ არის გარკვეული პრობლემები. პირველ რიგში, ეს ეხება იმას, რომ თავად ქსელშია პრობლემა, შეიძლება სათავე ნაგებობებში მეტ-ნაკლებად სრულფასოვნად ხდება წყლის გაწმენდა, მაგრამ ქალაქში წყლის გამანაწილებელი ქსელია დაზიანებული, განსაკუთრებით შიდაკვარტალური და ადგილობრივი ქსელები და მათი დაზიანების გამო ბინძურდება ხოლმე სასმელი წყალი, ეს არის ე.წ. მეორადი დაბინძურება.

რაც შეეხება გაწმენდით ტექნოლოგიას, შეიძლება ის წყლის ბაქტეოროლოგიურ გაწმენდას ითვალისწინებდეს, მაგრამ თავად ტექნოლოგია საკამათოა, იმ გაგებით, რომ გამოიყენება ქლორი, როცა თანამედროვე ტექნოლოგიებში აღიარებულია, რომ წყლის გაწმენდა ოზონის ტექნოლოგიით უნდა ხდებოდეს. ის უფრო უსაფრთხოა ადამიანის ორგანიზმისათვის. ცუდია, რომ სასმელი წყლის ხარისხის კონტროლი თავად კომპანიის პრეროგატივაა, ვფიქრობ, რომ სურსათის ეროვნული სააგენტოს მხრიდან უნდა იყოს რეაგირება", - ამბობს ლაშა ჩხარტიშვილი.

თეა ბეჟიტაშვილი

AMBEBI.GE

ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"

უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"

ვინ არის შორენა ბეგაშვილის ყოფილი ქმრის მეუღლე, რომელიც უკრაინაში ცნობილი დიზაინერია