დავით უსუფაშვილი LIBE-ს კომიტეტის გადაწყვეტილებაზე - დავმშვიდდეთ, საოცრად კარგი შედეგია

მიღებულია მნიშვნელოვანი გადაწყვეტილება, არის საოცრად კარგი შედეგი, - ამის შესახებ პარლამენტის თავმჯდომარე დავით უსუფაშვილმა ევროპარლამენტის LIBE-ს კომიტეტის გუშინდელი გადაწყვეტილების შეფასებისას განაცხადა.

როგორც უსუფაშვილმა აღნიშნა, იყო მცირედი შეფერხება, რომელმაც პროცესი მხოლოდ 2-3 თვით გადასწია.

„ვიზალიბერალიზაციაზე მიღებულია მნიშვნელოვანი გადაწყვეტილება. მაქსიმალისტი ქართველებისგან გუშინ საოცარი სადემონსტრაციო მაგალითი იყო ის რომ - ხუთმა წინააღმდეგ მისცა ხმა და ნეტა ვინ არის ის ხუთიო. დავმშვიდდეთ, არის საოცრად კარგი შედეგი, მათ შორის ბალანსთან დაკავშირებით. პროცესი მიდის წინ. როგორც არაერთხელ ვთქვით, იყო მცირედი შეფერხება, რამაც მხოლოდ ორი-სამი თვით გადასწია პროცესი და ბოლო იქნება სწორი და კარგი. ეს იქნება წინგადადგმული ნაბიჯი“, - განაცხადა უსუფაშვილმა.

ევროპარლამენტის სამოქალაქო თავისუფლებების, მართლმსაჯულებისა და საშინაო საქმეთა კომიტეტმა (LIBE) საქართველოს ვიზალიბერალიზაციის საკანონმდებლო ინიციატივას მხარი დაუჭირა. აღნიშნულ ინიციატივას კომიტეტის 44 წევრმა მისცა ხმა, ხოლო 5 წინააღმდეგ წავიდა. პროცედურის თანახმად, ამის შემდეგ ვიზალიბერალიზაციის საკითხზე ევროპარლამენტი, ევროკომისია და ევროკავშირის საბჭო დისკუსიას გამართავენ.

"ინტერპრესნიუსი"