ზურაბ ტყემალაძე ცესკო-ში "საჩხუბრად მისვლას" გეგმავს

"მრეწველების" ერთ-ერთი ლიდერი ზურაბ ტყემალაძე ცენტრალურ საარჩევნო კომისიაში "საჩხუბრად მისვლას" გეგმავს.

ამის შესახებ ტყემალაძემ "ინტერპრესნიუსს", ცესკო-ს მიერ მათი საარჩევნო ბლოკის რეგისტრაციიდან მოხსნის საკითხზე კომენტირებისას განუცხადა .

მისივე მტკიცებით, "მრეწველებს" ცენტრალურ საარჩევნო კომისიაში ყველა საჭირო დოკუმენტაცია წარდგენილი აქვთ.

"ცენტრალურ საარჩევნო კომისიაში რეგისტრაციისთვის საჭირო ყველა დუკუმენტი გვაქვს მიტანილი. ახლა ვაპირებ იქ საჩხუბრად მისვლას", - განაცხადა ტყემალაძემ.

ტყემალაძე და გოგი თოფაძე, სავარაუდოდ, ცესკო-ში უკვე იმყოფებიან, რის შესახებაც ჟურნალისტებს "თოფაძე -მრეწველები, ჩვენი სამშობლოს" რამდენიმე წევრმა განუცხადა.

აღსანიშნავია, რომ "თოფაძე -მრეწველები, ჩვენი სამშობლოს" წარმომადგენლები ამ წუთებში ცენტრალურ საარჩევნო კომისიასთან არიან შეკრებილები.

ცესკო-ს მიერ გუშინ გაკეთებული განცხადებით, "თოფაძე -მრეწველები, ჩვენი სამშობლო" საპარლამენტო არჩევნებში რეგისტრაცია ვერ გაიარა. მათ მიერ წარდგენილ დოკუმენტაციას საარჩევნო სია არ ერთვოდა, რაც რეგისტრაციის გაუქმების საფუძველი გახდა.