პარლამენტის ერთ-ერთი ვიცე-სპიკერი "პატრიოტთა ალიანსის" წევრიც გახდება

პარლამენტის სპიკერატში ვიცე-სპიკერის პოსტს "ქართული ოცნებისა" და "ნაციონალური მოძრაობის" გარდა, სავარაუდოდ, "პატრიოტთა ალიანსის" წარმომადგენელიც დაიკავებს.

"ინტერპრესნიუსის" ინფორმაციით, ვიცე-სპიკერის ერთ ადგილს მათთვის პარლამენტის რეგლამენტი ითვალისწინებს, რომლის მიხედვით, პარლამენტის თავმჯდომარის მოადგილის თითო კანდიდატურის წარდგენის უფლება (მაგრამ არა უმეტეს 3-ისა) იმ საარჩევნო სუბიექტების მიერ შექმნილ ფრაქციებს აქვთ, რომლებმაც საპარლამენტო არჩევნებში ბარიერი გადალახეს და რომლებიც არ არიან გაერთიანებული უმრავლესობაში.

შესაბამისად, პარლამენტის რეგლამენტის ამ ჩანაწერისა და ცესკოს წინასწარი მონაცემების გათვალისწინებით, პარლამენტის სპიკერატში თითო-თითო ვიცე-სპიკერი ეყოლება "ნაციონალურ მოძრაობას" და ასევე "პატრიოტთა ალიანსს" - წერს "ინტერპრესნიუსი".

გარდა ამისა, ერთი ვიცე-სპიკერის არჩევა მოხდება აჭარის ავტონომიური რესპუბლიკიდან მაჟორიტარული წესით არჩეულ პარლამენტის წევრთაგან, ხოლო ვიცე-სპიკერის არა უმეტეს სამი კანდიდატურის წარდგენის უფლება აქვს საპარლამენტო უმრავლესობას. პარლამენტის პირველ ვიცე-სპიკერს პარლამენტის თავმჯდომარის წარდგენით აირჩევენ.

პარლამენტი ვიცე-სპიკერებს ფარული კენჭისყრით, სიითი შემადგენლობის უმრავლესობით ირჩევს, რაც პირველივე სხდომაზე, პარლამენტის თავმჯდომარის არჩევასთან ერთად უნდა მოხდეს.