ერეკლე კოდუა ავსტრიაში სათხილამურო კურორტზე დაშავდა

სოდ-ის ყოფილი უფროსი ერეკლე კოდუა ავსტრიაში სათხილამურო კურორტზე ყოფნის დროს სერიოზულად დაშავდა. AMBEBI.GE-ს წყაროს ინფორმაციით, შემთხვევა იანვრის ბოლოს მოხდა და კოდუამ სხვადასხვა სახის დაზიანება მიიღო. მას უკვე ჩაუტარდა ოპერაცია და წოლითი ამჟამად რეჟიმი აქვს. სოდ-ის ყოფილი უფროსი, რომელზეც სამართლებრივი დევნა მიმდინარეობს, ავსტრიაში შვილებთან და ძმასთან, გიორგი კოდუასთან ერთად იმყოფებოდა.

იმის გასარკვევად, თუ რა შეემთხვა ერეკლე კოდუას, AMBEBI.GE სოდ-ის ყოფილი უფროსის დედას, ბიზნესმენ ლაურა ღაჭავას დავუკავშირდით: "ერეკლე ავსტრიაში იყო ბავშვებთან ერთად. ბავშვები როცა ჩამოსრიალდნენ ერეკლემ დახმარება სცადა, რა დროსაც ტრავმა მიიღო...

- რა სახის დაზიანებები მიიღო?

- თავდაპირველად მარცხენა ხელი და ფეხი წაერთვა, სახლში იწვა, ეგონა ტკივილი გაუვლიდა, მაგრამ როცა გაუძლიერდა ტკივილები, საავადმყოფოში მივიდა. როგორც აღმოჩნდა, მესამე და მეხუთე მალა ჰქონდა დაზიანებული. სასწრაფო ოპერაცია ჩაუტარდა, ახლა წოლითი რეჟიმი აქვს, მეორე ოპერაციაც უნდა გაუკეთდეს, მაგრამ ზუსტად ვერ გეტყვით როდის გაუკეთებენ, რადგან ჯერ უნდა მოძლიერდეს მისი ჯანმრთელობის მდგომარეობა. მარცხენა ხელს ახლაც ვერ ამოძრავებს.

თამარ ბოჭორიშვილი

AMBEBI.GE