თეა წულუკიანი ქალიშვილის ნათლობის ფოტოებს ავრცელებს

იუსტიციის მინისტრმა თეა წულუკიანმა ფეისბუქის პირად გვერდზე ქალიშვილის ნათლობის ფოტოები განათავსა. პატარა მერიკო ივლისში მოინათლა, მაშინ როცა მისმა მშობლებმა - თეა წულუკიანმა და ნუგზარ კაკულიამ ჯვარი დაიწერეს.

ორივე ცერემონია გასაიდუმლოებული იყო, მინისტრის დაცვამ ჟურნალისტებს ტერიტორია დაატოვებინა, რომ წყვილის ჯვრისწერის ცერემონია არ დაეფიქსირებინათ. ნათლობისა და ჯვრისწერის ცერემონია გერგეტის სამებაში გაიმართა.

მერი კაკულია 7 თვისაა. მინისტრი ქალიშვილთან ერთად ძალიან ხშირად ჩნდება საზოგადოებაში, მასთან ერთად მონაწილეობს სხვადასხვა აქტივობებში და ღონისძიებებზეც დაჰყავს.

შეგახსენებთ, თეა წულუკიანმა მეუღლესთან ხელი 2016 წლის 4 დეკემბერს მოაწერა. მისი მეუღლე ნუგზარ კაკულიაა, რომელიც იუსტიციის სასწავლო ცენტრის დირექტორის პოსტს იკავებდა. წყვილს 18 მარტს ქალიშვილი შეეძინა, რომელსაც მერი დაარქვეს.