"ჩვენ ხალიფატი დავტოვეთ და ახლა თქვენთან მოვდივართ" - მსოფლიო ISIS-ის მოლოდინში

"ჩვენ ხალიფატი დავტოვეთ და ახლა თქვენთან მოვდივართ" - მსოფლიო ISIS-ის მოლოდინში

რუსეთის თავდაცვის მინისტრის სერგეი შოიგუს განცხადებით, სირიის არმიამ, რუსეთის შეირაღებული ძალების დახმარებით, ტერორისტების მიერ კონტროლირებადი ბოლო ქალაქი აბუ ქემალიც აიღო. ეს ნიშნავს, რომ ისლამურმა სახელმწიფომ "ხალიფატი" დატოვა...

"ახლა უკვე დეირ-ეზ-ზორში განნაღმვითი სამუშაოები მიმდინარეობს... იგივე იგეგმება აბუ-ქემალში, განსაკუთრებით სახიფათოა ქალაქის ცენტრი, სადაც ტერორისტები დიდი ხნის განმავლობაში იმყოფებოდნენ... ბოლო 4 დღე განსაკუთრებით მძიმე იყო." - აცხადებს რუსი გენერალი და დასძენს, რომ ისინი ერაყის საზღვრის მიმართულებით გადაადგილდებოდნენ.

შოიგუ იმედოვნებს, რომ მათი ჩრდილოელი კოლეგები, ვინც ევფრატის სანაპიროებზე მიმდინარე სამხედრო ოპერაციებში მონაწილეობდნენ, თავიანთი სამხედრო ძალების ტერორისტების წინააღმდეგ მიმართვას შეძლებენ...

"ჩვენ ხალიფატი დავტოვეთ და ახლა თქვენთან მოვდივართ" - ამ მიმართვით დატოვეს ისლამური სახელმწიფოს ლიდერებმა სირიის ქალაქები. ამით მსოფლიო ცივილურ ქვეყნებს, მათ ხელისუფლებას, უსაფრთხოების სამსახურებსა და მოსახლეობას სიმშვიდე სამუდამოდ თუ არა, დიდი ხნით დაუფრთხეს. ამის მაგალითია, ბოლო დროის განმავლობაში სხვადასხვა ქვეყნებში განხორციელებული ტერაქტები, რომლებსაც ასობით ადამიანი შეეწირა...

თუ სტატისტიკას გადავხედავთ, ყველაზე მეტი ადამიანი ISIS -ის რიგებში, სწორედ რუსეთიდან, კონკრეტულად, ჩრდილოეთ კავკასიიდან მიდიოდა. სირიასა და ერაყს ძალიან ბევრი მოხალისე მიაწყდა ტაჯიკეთსა და უზბეკეთიდან... მათი უმეტესობა "ისლამური სახელმწიფოში" თურქეთის გავლით ჩადიოდა. თურქეთი ამ წლების განმალობაში, "გამანაწილებლის" ფუნქციას ასრულებდა და ასეა დღესაც...

თუმცა, მანამდე ISIS -ის რუსულ "რესურსზეც" შეიძლება ორიოდე სიტყვის თქმა – საქმე ის არის, რომ "ისლამური სახელმწიფოს" რიგებში, მხოლოდ რუსეთის ხელისუფლებაზე გაბრაზებული დაღესტნელები, ინგუშები ან ჩეჩნები არ მიდიოდნენ, როგორც ამას რუსული სპეცსამსახურები წარმოაჩენენ. ISIS -ის რიგებში წარმატებული სამხედროების გვარებიც დაფიქსირდა. მათ შორის არიან ოფიცრები, სამხედრო სტრატეგები და სახელმწიფოს უსაფრთხოების ინფორმაციის შენახვაზე პასუხისმგებელი პირები, რომელთაც განათლება, უმეტეს შემთხვევაში, ძალიან პრესტიჟულ სამხედრო სასწავლებლებში ჰქონდათ მიღებული.

ამის ნათელი მაგალითია, დენის ხისამოვი, რომელიც გარკვეული დროის განმავლობაში მსოფლიო ISIS -ის მოლოდინში რიგებში იბრძოდა, მისი დასუსტების შემდეგ კი, კონკრეტული დავალებებით რუსეთსა და თურქეთში ბრუნდებოდა, რა დროსაც დააკავეს... რუსული მედიის ინფორმაციით, სხვადასხვა სუბიექტური თუ ობიექტური მიზეზებით, ტერორისტებს, სამხედროების გარდა, სხვა არაერთი პროფესიის ადამიანები, მათ შორის პროგრამისტები და მედიკოსებიც შეუერთდნენ...

რაც შეეხება თურქეთს, ის "ხალიფატის" დაცემის შემდეგაც, ყოველდღე ებრძვის ტერორიზმს. 10 ნოემბერს, სირიაში გადასვლისა და ISIS -ში გაწევრების მცდელობის ბრალდებით, სტამბოლში 80-ზე მეტი პირი დააკავეს, რომლებიც "ისლამურ სახელმწიფოსთან" კავშირში არიან ეჭვმიტანილი. ადგილობრივი გაზეთ "საბახის" ინფორმაციით, დაკავებები სტამბოლის რამდენიმე რაიონში ერთდროულად მიმდინარეობდა.

გამოცემის ინფორმაციით, გარდა ამისა, პარასკევს დილით ადგილობრივმა პოლიციამ ქვეყნის სამხრეთ ნაწილში, ადანის პროვინციაში სირიიდან გადმოსული, ასევე ISIS -ისთან კავშირში ეჭვმიტანილი 11 პირი დააკავა... უფრო ადრე, თურქეთის დედაქალაქ ანკარაში იგივე ბრალდებით 100-ზე მეტი პირი დააკავეს...

ISIS -ს დაფინანსება და ადამიანური რესურსი

BBC –ის ინფორმაციით, თავდაპირველად "ისლამური სახელმწიფოს" დამფინანსებლად, საუდის არაბეთისა და კატარიდან ბიზნესმენები, ასევე, სუნიტური მიმდინარეობის წარმომადგენლები მიიჩნეოდნენ. ისინი სირიის პრეზიდენტის, ბაშარ ასადის დასამარცხებლად თანხებს არ იშურებდნენ, რადგან ის ალავიტურ მიმდინარეობას წარმოადგენდა. მიმდინარე წელს, ISIS -ის დაფინანსების გამო, რამდენიმე სახელმწიფომ შეზღუდვები დაუწესა ყატარს, რომელიც ამ ბრალდებას კატეგორიულად უარყოფდა.

ამბობენ, რომ ეს ფინანსური არხები ბოლო დრომდე არ დახურულა და სირიასა და ერაყში ბოევიკების ჩაყვანის პროცესი სწორედ მათი დახმარებით ფინანსდებოდა. თუმცა, ISIS არც ფინანსების დამოუკიდებლად "მოპოვებაზე" იხევდა უკან.

ამერიკელი ექსპერტების შეფასებით, 2014 წელს "ისლამურმა სახელმწიფომ" ერთი წლის განმავლობაში, დაახლოებით, 100 მილიონი დოლარი ნავთობითა და იმ ნავთობპროდუქტების ვაჭრობით მიიღო, რომლის გადატანაც თურქეთის საზღვარზე კონტრაბანდული გზით განხორციელდა და რომელიც, შემდგომ ირანისა და სირიის ხელისუფლებამ ჩუმად შეიძინა...

მოგვიანებით, ნავთობსაცავებზე საჰაერო დარტყმების განხორციელების შედეგად, ეს შემოსავალი დაკარგეს... თუმცა, შემოსავლის მიღებაში, ისევე როგორც ტერაქტების დაგეგმვაში, მათი მოქმედება სწორხაზოვანი არ ყოფილა. მხოლოდ ერთი წლის განმავლობაში, ტერორისტების მიერ გატაცებული ადამიანების თავისუფლების სანაცვლოდ მიღებულმა გამოსასყიდმა თანხამ, უხეში გათვლებით, დაახლოებით, 20 მილიონი დოლარი შეადგინა. ერთი მილიონი დოლარი - ეს მათთვის გატაცებულის გასათავისუფლად დაწესებული სტანდარტული თანხა იყო... გადაუხდელობის შემთხვევაში მსოფლიო საზოგადოებას, კამერის წინაშე ჩადენილი უსასტიკესი კადრების ათეულობითი შემთხვევა ახსოვს, რასაც ისინი ფსიქოლოგიურ იარაღადაც შესანიშავად იყენებდნენ...

მათი მსხვერპლი ხდებოდნენ საერთაშორისო ორგანიზაციის წევრები, რომლებიც სირიასა და ერაყში, ჰუმანიტარული მისიით იყვნენ ჩასული. ასევე, ISIS საკმაოდ ფულს იღებდა გატაცებული ქალებისა და გოგონების გაყიდვითაც, რომელთაც სექს-მონებად აქცევდნენ...

ის ადამიანები, ვინც სასწაულებრივად გადაურჩნენ "ისლამური სახელმწიფოს" რეჟიმს, ჰყვებოდნენ, რომ ISIS –ში არსებობს "სადაზვერვო აპარატი", რომელიც სირიაში მომუშავე ჟურნალისტების ინფორმაციის მოგროვებაზე მუშაობს. ისინი მათი ყურადღების ცენტრში, ჩასვლის წუთიდან ხვდებიან... იგივე "უწყება" აკონტროლებს და იღებს ინფორმაციას მსოფლიოში დაგეგმილი, განსახორციელებელი და განხორციელებული ქმედებების შესახებ...

ისინი გაწაფული იყვნენ ბანკების ძარცვაშიც, ასევე, რელიგიური უმცირესობისგან მიღებულ გადასახადებში, რომელსაც მათი სარწმუნოების გამო აკისრებდნენ.

ცოტა უფრო ადრე, 2011 წლიდან ისლამისტური საქველმოქმედო ფონდები და უბრალოდ, მდიდარი ადამიანები სირიაში მეამბოხე დაჯგუფებებისთვის შეიარაღებას ყიდულობდნენ. ცალკე თემაა, თუ რომელი ქვეყნებიდან... მას შემდეგ, რაც "აისისი" გაფართოვდა, დონორთა უმრავლესობა პირდაპირ თუ ირიბად ამარაგებდა ფულით ჯიჰადისტურ ორგანიზაციებს. იმ წლებში, საერთაშორისო სადეპოზიტო ბანკების გადარიცხვებიც კი ხორციელდებოდა, შემდეგ, სისტემა შეიცვალა...

მსოფლიოში გახმაურებული ფაქტია, "ისლამური სახელმწიფოს" დაკავებული "კურიერისთვის" ჩამორთმეულ კომპიუტერულ ჩიპში აღმოჩენილი ინფორმაცია, რომლის თანახმადაც, 2014 წელს ISIS 875 მილიონ ამერიკულ დოლარს ფლობდა. მოსულის დაცემის შემდეგ, მათი ბიუჯეტი საგრძნობლად გაიზარდა...

ცნობილია, რომ ტერორისტები კარგად ფლობენ ტექნოლოგიებს. აქვთ დაცული პაროლის მქონე ფორუმები, სადაც თავიანთ მხარდამჭერებთან ერთად, უსაფრთხო საუბრებისთვის იკრიბებოდნენ. "ფეისბუქით", "ტვიტერით" "ინსტაგრამითა" და სხვა სოციალურ ქსელებით, მათმა კარგად მომზადებულმა "კადრებმა", რომლებიც რელიგიურ თემაზე აპელირებდნენ, ათასობით ახალგაზრდა "დაავერბოვკეს"...

ასე რომ, ის, რომ "ხალიფატი" დაეცა და სირია თავისუფალია, მათგან მომავალ საფრთხეს არ ამცირებს, - მით უფრო, რომ გამოცდილებამ არაერთხელ გვიჩვენა, არაერთი შემთხვევა ყოფილა, როდესაც სწორედ ისინი ექცევიან მათი გავლენის ქვეშ, ვისაც საზოგადოების უსაფრთხოების დაცვა ევალება...

ლალი პაპასკირი

AMBEBI. GE

"კლინიკაში შემოყვანილი 5 ჯარისკაციდან ერთს პნევმონია აქვს" - ლალი ტურძელაძე

გამთენიისას მარნეულში სამხედრო ტექნიკა შეიყვანეს

როგორ ებრძვიან კორონავირუსს NATO-ს სამხედრო ბაზაზე - რას ჰყვება ამერიკულ არმიაზე ქართველი ქალი სამხედრო