"სკანდალის შემდეგ დაიწყო წულუკიანმა საუბარი, რომ უგრეხელიძეს დაელაპარაკება, შიდა მოკვლევაც კი არ ჩაუტარებია, ყურადღება არ მიაქცია ამ ფაქტს"

ექსპერტი გია ხუხაშვილი მიიჩნევს, რომ საჯარო რეესტრის ყოფილი ხელმძღვანელის, პაპუნა უგრეხელიძის საქმესთან დაკავშირებით, იუსტიციის მინისტრის პასუხისმგებლობაც იკვეთება. კერძოდ, როგორც ხუხაშვილმა ”ინტერპრესნიუსს” განუმარტა, იუსტიციის მინისტრი, მითუმეტეს როდესაც სახალხო დამცველის დასკვნა არსებობდა, ვალდებული იყო, მოკვლევა ჩაეტარებინა.

”რა თქმა უნდა, ჩნდება კითხვები იმასთან დაკავშირებით, რომ მინისტრს მოკვლევაც არ ჩაუტარებია, მითუმეტეს, როდესაც სახალხო დამცველმა შეისწავლა საკითხი. მეტსაც გეტყვით, როდესაც სკანდალი განვითარდა, პოსტფაქტუმ დაიწყო წულუკიანმა საუბარი იმაზე, რომ უნდა დაელაპარაკოს უგრეხელიძეს. ირკვევა, რომ შიდა მოკვლევაც კი არ ჩაუტარებია, მან უბრალოდ ყურადღება არ მიაქცია ამ ფაქტს. ამ ვითარებაში, მისი პასუხისმგებლობის საკითხი დგება. თუმცა, ჩემი აზრით, ეს იუსტიციის მინისტრთან მთავარი კომპრომატი არ არის. ჩემთვის პირადად მის წინააღმდეგ კომპრომატი არის ევროსასამართლოს გადაწყვეტილებები, კოლექტიური მურუსიძის მართლმსაჯულების სათავეში გამაგრება და ა.შ. იუსტიციის მინისტრი ბევრ რამეზეა პასუხისმგებელი ამ ქვეყანაში”, - განაცხადა ხუხაშვილმა.

შეგახსენებთ, საჯარო რეესტრის ეროვნული სააგენტოს უკვე ყოფილი თავმჯდომარე პაპუნა უგრეხელიძე სექსუალურ შევიწროებაში დაადანაშაულეს. პაპუნა უგრეხელიძემ საჯარო რეესტრის ეროვნული სააგენტოს თავმჯდომარის პოსტი დატოვა და მისი მისამართით გამოთქმული ბრალდებები შურისძიების მოტივით ახსნა.